ភ្នំពេញ៖ ក្រុមការងារផ្នែកសេវាធនាគារនិងហិរញ្ញវត្ថុ (ក្រុម”ង”) បានប្រជុំគ្នារកដំណោះស្រាយឆ្លើយតបទៅនឹងបញ្ហារបស់វិស័យឯកជន ដើម្បីបន្តរក្សាស្ថិរភាពប្រព័ន្ធធនាគារ និងជំរុញកំណើនសេដ្ឋកិច្ច។ កិច្ចប្រជុំដែលធ្វើឡើងនៅថ្ងៃ១៣ ខែសីហា ឆ្នាំ២០២៤ ធ្វើឡើងក្រោមសហប្រធានផ្នែករដ្ឋាភិបាល គឺលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងតំណាងផ្នែកវិស័យឯកជន គឺអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា។

បើតាមធនាគារជាតិនៃកម្ពុជា កិច្ចប្រជុំនេះ ធ្វើឡើងដើម្បីត្រួតពិនិត្យវឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ និងពិភាក្សារកដំណោះស្រាយឆ្លើយតបទៅនឹងបញ្ហាប្រឈមមួយចំនួន ដែលវិស័យឯកជនជួបប្រទះកន្លងមក។ កិច្ចប្រជុំរកដំណោះស្រាយរួមរវាងរដ្ឋាភិបាល និងវិស័យឯកជននេះ សំដៅបន្តរក្សាស្ថិរភាពប្រព័ន្ធធនាគារ និងជំរុញកំណើនសេដ្ឋកិច្ចប្រកបដោយចីរភាព។

សូមបញ្ជាក់ផងដែរថា កិច្ចប្រជុំដែលធ្វើឡើងនៅធនាគារជាតិនៃកម្ពុជា អគារសែនសុខ មានអ្នកចូលរួមពីតំណាងក្រសួងស្ថាប័នរដ្ឋាភិបាល សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា គ្រឹះស្ថានធនាគារនិងហិរញ្ញវត្ថុ ព្រមទាំងភាគីពាក់ព័ន្ធសរុបប្រមាណ ១១០រូប៕