ភ្នំពេញ៖ មជ្ឈមណ្ឌលបណ្ដុះធុរកិច្ចថ្មី «តេជោ» បានបើកបណ្តុះបណ្តាលវគ្គចាប់យកឌីជីថលស្តីពី «បរិវត្តកម្មឌីជីថលសម្រាប់សេដ្ឋកិច្ចក្រៅប្រព័ន្ធ» ជំនាន់ទី១ ដល់អាជីវករនៅភ្នំពេញ ដែលក្នុងនោះមានថ្នាក់ដឹកនាំ មន្ត្រីជំនាញរបស់រដ្ឋបាលខណ្ឌទាំង១៤ នៃរាជធានីភ្នំពេញ អ្នកបង្ហាត់បង្ហាញ ភ្ញៀវកិត្តិយស និងអាជីវករសរុប ១,៣៨៥នាក់ ដើម្បីបង្កើនផលិតភាព និងប្រាក់ចំណូល។

អាជីវករមកពីខណ្ឌទាំង ១៤នោះ រួមមាន៖ ខណ្ឌជ្រោយចង្វារចំនួន ១០២នាក់, ខណ្ឌព្រែកព្នៅ ៧៦នាក់, ខណ្ឌសែនសុខ ១០៦នាក់, ខណ្ឌកំបូល ១១៦នាក់, ខណ្ឌឬស្សីកែវ ១០៣នាក់, ខណ្ឌដូនពេញ ១១៥នាក់ និងខណ្ឌពោធិ៍សែនជ័យ ១៣៨នាក់។ ចំណែកខណ្ឌ ៧មករា មានអ្នកចូលរួមក្នុងវគ្គចាប់យកឌីជីថលចំនួន ៨០នាក់, ខណ្ឌចំការមនចំនួន ៩២នាក់, ខណ្ឌដង្កោ ៨៩នាក់, ខណ្ឌទួលគោក ៨៥នាក់, ខណ្ឌបឹងកេងកង ៧៤នាក់, ខណ្ឌច្បារអំពៅ ១០២នាក់ និងខណ្ឌមានជ័យចំនួន ១០៧នាក់។

«វគ្គចាប់យកឌីជីថល» ត្រូវបានរៀបចំឡើងដោយកិច្ចសហការរវាងមជ្ឈមណ្ឌលបណ្ដុះធុរកិច្ចថ្មី «តេជោ» ដែលជាស្ថាប័នអនុវត្ត កម្មវិធីបរិវត្តកម្មឌីជីថលសហគ្រាស-Enterprises Go Digital (EGD) និងរដ្ឋបាលខណ្ឌទាំង១៤ នៃរាជធានីភ្នំពេញ ដោយមានការគាំទ្រថវិកាពី មូលនិធិអភិវឌ្ឍន៍ជំនាញ។ កម្មវិធីនេះដែរ មានគោលបំណងពង្រឹងសមត្ថភាពឌីជីថលរបស់សហគ្រាស ដើម្បីផ្លាស់ប្តូរបៀបរបបប្រកបអាជីវកម្មក្នុងយុគសម័យឌីជីថល ព្រមទាំងជំរុញការចាប់យកការប្រើប្រាស់បច្ចេកវិទ្យាឌីជីថលនៅក្នុងប្រតិបត្តិការអាជីវកម្ម ដើម្បីបង្កើនផលិតភាព និងប្រាក់ចំណូលដល់អ្នកសេដ្ឋកិច្ចក្រៅប្រព័ន្ធ៕