ភ្នំពេញ៖ Fake base transceiver station (Fake BTS) គឺជាឧបករណ៍ផ្សាយស៊ីញ៉ាល់ ឬសេវាទូរសព្ទក្លែងក្លាយ ដោយពុំឆ្លងកាត់បណ្តាញរបស់ប្រតិបត្តិករទូរសព្ទចល័តឡើយ។ ឧបករណ៍នេះ មានសមត្ថភាពកាត់ផ្តាច់សេវាទូរសព្ទដៃ និងធ្វើឱ្យទូរសព្ទដៃអ្នកប្រើប្រាស់ ចាប់យកស៊ីញ៉ាល់ក្លែងបន្លំរបស់ឧបករណ៍ Fake BTS ដែលធ្វើឱ្យមានផលរំខានដល់ការប្រើប្រាស់សេវាទូរសព្ទចល័ត មានការបន្លំផ្ញើសារខ្លី (SMS) ដែលមានផ្ទុកតំណលីង ដើម្បីឆបោកផ្សេងៗ។

កម្ពុជាឆ្ពោះទៅឌីជីថល បានចែករំលែកថា ឧបករណ៍ Fake BTS វាដំណើរការដោយបង្កើតស៊ីញ៉ាល់ ឬសេវាទូរសព្ទដោយខ្លួនឯង ហើយធ្វើការស្កេនរកលេខអត្តសញ្ញាណរបស់ទូរសព្ទចល័ត (Mobile IMSI) បន្ទាប់មកគឺ ផ្តាច់សេវារបស់អ្នកប្រើប្រាស់ពីប្រព័ន្ធរបស់ប្រតិបត្តិករទូរសព្ទចល័ត ដោយបញ្ឆោតឱ្យទូរសព្ទចល័តភ្ជាប់ទៅកាន់ឧបករណ៍ Fake BTS ទើបឧបករណ៍នេះ បញ្ជូនសារខ្លីទៅកាន់ទូរសព្ទចល័ត ដោយពុំឆ្លងកាត់បណ្តាញរបស់ប្រតិបត្តិករទូរសព្ទចល័តនោះឡើយ។

Fake BTS នឹងផ្តល់ផលរំខាន រួមមានងាយឆបោកជនរងគ្រោះ ដោយផ្ញើសារអំពីល្បែងស៊ីសង, កម្ចីឯកជនខុសច្បាប់ផ្សេងៗ និងសារខ្លីច្រើន ដែលរំខានសាធារណជនជាដើម។ ជនខិលខូច ក៏អាចប្រើប្រាស់ប្រព័ន្ធនេះ ដើម្បីបន្លំខ្លួនជាស្ថាប័នណាមួយ ឬប្រតិបត្តិករទូរសព្ទចល័ត ឬអាចជាលេខទូរសព្ទទូទៅ តាមរយៈការប្តូរលេខអ្នកផ្ញើ (Sender name modification) រួចផ្ញើសាខ្លីទៅអ្នកប្រើប្រាស់។ គោលបំណងរបស់ជនខិលខូចនេះ គឺដើម្បីបញ្ឆោតឱ្យជនរងគ្រោះចុចតំណភ្ជាប់ណាមួយ ដើម្បីផ្សព្វផ្សាយកម្ចីឯកជន ល្បែងស៊ីសង ឬតំណភ្ជាប់ផ្សេងៗ ដែលអនុញ្ញាតឱ្យជនខិលខូចចូលទៅលួចយកព័ត៌មានផ្សេងៗ និងអាច នាំឱ្យបាត់បង់ផលប្រយោជន៍ណាមួយ៕