ភ្នំពេញ៖ សហព័ន្ធសិក្សាស្រាវជ្រាវសេដ្ឋកិច្ចឧស្សាហកម្មតំបន់ឆ្នេរក្វាងទុង-ហុងកុង-ម៉ាកាវ ចាប់អារម្មណ៍វិនិយោគវិស័យថាមពលជីវម៉ាសនិងអប់រំ ពិសេសក្នុងការចូលរួមជាមួយរដ្ឋាភិបាលក្នុងការវិយោគលើវិស័យការពារបរិស្ថាន។ នេះជាការលើកឡើងរបស់លោក LIANG Songshou ប្រធានសហព័ន្ធសិក្សាស្រាវជ្រាវសេដ្ឋកិច្ចឧស្សាហកម្មតំបន់ឆ្នេរក្វាងទុង-ហុងកុង-ម៉ាកាវ កាលពីថ្ងៃទី១៧ ខែធ្នូ ឆ្នាំ២០២៤។

ក្នុងជំនួបរវាងលោក LIANG Songshou និងឯកឧត្តម លីម ឡោកពិសិដ្ឋ រដ្ឋលេខាធិការក្រសួងពាណិជ្ជកម្មនេះ គឺដើម្បីពង្រឹងនូវទំនាក់ទំនងពាណិជ្ជកម្ម និងការវិនិយោគរវាងខេត្តក្វាងទុងជាមួយកម្ពុជា ក៏ដូចជាស្វែងយល់បន្ថែមអំពីគោលនយោបាយដែលពាក់ព័ន្ធនឹងវិស័យពាណិជ្ជកម្ម វិនិយោគ អប់រំ ថាមពល និងបរិស្ថាននៅកម្ពុជាផងដែរ។

ក្នុងកិច្ចពិភាក្សានេះ ឯកឧត្តម លីម ឡោកពិសិដ្ឋ ក៏បានលើកឡើងអំពីគោលនយោបាយ និងយុទ្ធសាស្រ្តសំខាន់ៗដែលបានដាក់ចេញដោយរាជរដ្ឋាភិបាលកម្ពុជា ជាពិសេសមានក្រសួងពាណិជ្ជកម្មជាសេនាធិការ ក្នុងការធ្វើឱ្យប្រសើរឡើងនូវការធ្វើពាណិជ្ជកម្ម និងការទាក់ទាញការវិនិយោគបន្ថែមទៀតពីគ្រប់មជ្ឈដ្ឋាន។ ឯកឧត្តម លីម ឡោកពិសិដ្ឋ ក៏បានលើកឡើងអំពីចំណងមិត្តភាពរវាងកម្ពុជា-ចិន, ការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន, កិច្ចសហប្រតិបត្តិការផ្សេងៗទៀតទាំងក្នុងតំបន់ និងសកលលោក៕