ភ្នំពេញ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានចែករំលែកអំពីតួនាទី និងមុខងាររបស់ Authentication (ការផ្ទៀងផ្ទាត់អត្តសញ្ញាណ) និង Authorization (ការអនុញ្ញាតសិទ្ធិប្រើប្រាស់) ដែលជាមូលដ្ឋានសំខាន់ ដើម្បីការពារការលួចទិន្នន័យ ការក្លែងបន្លំ និងបង្កើនទំនុកចិត្តលើប្រព័ន្ធឌីជីថល ដូចខាងក្រោម៖

ចំពោះ Authentication គឺសំដៅទៅលើការផ្ទៀងផ្ទាត់អត្តសញ្ញាណរបស់បុគ្គល ឧបករណ៍អេឡិចត្រូនិច ប្រព័ន្ធ និងបណ្តាញសង្គមជាដើម ដើម្បីធានាសុវត្ថិភាពបុគ្គលមុនចូលប្រើប្រាស់ ឬទាញយកទិន្នន័យតាមរយៈបណ្តាញអ៊ីនធឺណិត។ វិធីសាស្រ្ត នៃការផ្ទៀងផ្ទាត់សំខាន់ៗចំនួន៤ ក្នុង Authentication មានដូចជា៖ ទី១. Two-Factor Authentication (2FA) ពាក្យសម្ងាត់ ឬលេខកូដសម្ងាត់ផ្ញើសារទៅទូរសព្ទដៃរបស់អ្នកប្រើប្រាស់។

ទី២. Multi-Factor Authentication (MFA) ការផ្ទៀងផ្ទាត់ពហុ ឬច្រើនកត្តាដើម្បីបង្កើនសុវត្ថិភាព, ទី៣. Biometric Authentication ការផ្ទៀងផ្ទាត់ជីវមាត្រ មានដូចជាប្រើក្រញ៉ៅដៃ ការស្កេនផ្ទៃមុខ ឬការប្រើប្រាស់សម្លេងសម្គាល់ជាដើម (voice recognize) និងទី៤.Certificate-Based Authentication ការផ្ទៀងផ្ទាត់ប្រើវិញ្ញាបណ្ណបត្រ ឬកាតឌីជីថល ដើម្បីផ្ទៀងផ្ទាត់អត្តសញ្ញាណបុគ្គល។

ចំណែក Authorization គឺជាដំណើរការនៃការកំណត់ ឬអនុញ្ញាតឱ្យចូលប្រើប្រព័ន្ធ ឬឧបករណ៍អេឡិចត្រូនិច បន្ទាប់ពីអត្តសញ្ញាណរបស់បុគ្គលត្រូវបានផ្ទៀងផ្ទាត់ (Authentication) ។ ការអនុញ្ញាតឱ្យចូលប្រើប្រាស់ ដែលបានកំណត់ជាក់លាក់ មានដូចជាអនុញ្ញាតអាន កែ ឬលុបឯកសារ ទាញយកទិន្នន័យ ប្រតិបត្តិការលើកម្មវិធី ឬឧបករណ៍អេឡិចត្រូនិចជាដើម។

គួរបញ្ជាក់ថា ការរួមផ្សំគ្នារវាងការផ្ទៀងផ្ទាត់អត្តសញ្ញាណ (Authentication) និងការអនុញ្ញាតសិទ្ធិប្រើប្រាស់ (Authorization) ជាមូលដ្ឋានគ្រឹះ នៃសុវត្ថិភាពលើបណ្តាញអ៊ីនធឺណិត និងមានសារសំខាន់ដល់ស្ថាប័ន ឬអង្គភាព ដូចជា៖ ការពារការចូលលួចយកទិន្នន័យ ប្រើប្រាស់កម្មវិធី ឬឧបករណ៍អេឡិចត្រូនិចដោយគ្មានការអនុញ្ញាត, បង្កើតទំនុកចិត្តលើភាពសុចរិតនៃប្រព័ន្ធ និងអ្នកប្រើប្រាស់ និងកាត់បន្ថយការក្លែងបន្លំតាមរយៈការផ្ទៀងផ្ទាត់អត្តសញ្ញាណ វាជួយការពារការលួចអត្តសញ្ញាណ ឬការក្លែងបន្លំ៕