ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ទីភ្នាក់ងារស្វីសសម្រាប់កិច្ចសហប្រតិបត្តិការ និងការអភិវឌ្ឍ(SDC) ដើរតួនាទីយ៉ាងសំខាន់ក្នុងការលើកកម្ពស់កម្លាំងពលកម្មកម្ពុជា ជាមួយនឹងជំនាញដែលស្របទៅនឹងតម្រូវការទីផ្សារ និងការអភិវឌ្ឍប្រទេស។ ឯកឧត្តមរដ្ឋមន្ត្រីការងារ លើកឡើងដូច្នេះ ក្នុងជំនួបជាមួយលោក Reto Gruninger នាយកការិយាល័យកិច្ចសហប្រតិបត្តិការ និងកុងស៊ុលស្វីសប្រចាំកម្ពុជា។

ឯកឧត្តមរដ្ឋមន្ត្រី ហេង សួរ ជឿជាក់ថា ទីភ្នាក់ងារ SDC នឹងបន្តកិច្ចសហប្រតិបត្តិការជាមួយក្រសួងការងារ លើវិស័យ TVET និងការងារទេសន្តរប្រវេសន៍សម្រាប់កម្ពុជាកាន់តែច្រើនថែមទៀត។ បន្ថែមលើនេះ ឯកឧត្តម ហេង សួរ ក៏បានអរគុណដល់ទីភ្នាក់ងារ SDC ក្នុងការជួយគាំទ្រកម្ពុជា លើការពង្រឹងប្រព័ន្ធអប់រំបណ្តុះបណ្តាលវិជ្ជាជីវៈ (TVET) នៅកម្ពុជាផងដែរ។

ក្នុងជំនួបនៅទីស្តីការក្រសួងការងារ កាលពីថ្ងៃទី១០ ខែធ្នូ ឆ្នាំ២០២៤ លោក Reto Gruninger បានអរគុណដល់ក្រសួងការងារ ដែលផ្តល់នូវកិច្ចសហប្រតិបត្កិការជាមួយទីភ្នាក់ងារស្វីសសម្រាប់កិច្ចសហប្រតិបត្តិការ និងការអភិវឌ្ឍ(SDC)។ លោក Reto Gruninger បានបន្តថា សម្រាប់កិច្ចសហប្រតិបត្តិការរវាងភាគីទាំងពីរ ក្នុងឆ្នាំ២០២៥ ខាងមុខនេះ លោកសង្ឃឹមថា នឹងទទួលបាននូវលទ្ធផលកាន់តែល្អប្រសើរ៕