ភ្នំពេញ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និង ឯកឧត្តម Derek Yip ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសអូស្ត្រាលី ប្រចាំកម្ពុជា ពិភាក្សាជំរុញពាណិជ្ជកម្មទ្វេភាគី ក្នុងគោលបំណងពង្រឹង និងពង្រីកទំនាក់ទំនងពាណិជ្ជកម្មរវាងកម្ពុជា-អូស្ត្រាលី ឱ្យកាន់តែរីកចម្រើនបន្ថែម។ កិច្ចពិភាក្សានេះ បានធ្វើឡើងនៅទីស្តីការក្រសួងពាណិជ្ជកម្ម កាលពីថ្ងៃទី៩ ខែធ្នូ ឆ្នាំ២០២៤។

ក្រៅពីការជំរុញពាណិជ្ជកម្មទ្វេភាគី ភាគីទាំងពីរ ក៏បានជជែកពីកិច្ចសហប្រតិបត្តិការអភិវឌ្ឍន៍ជាមួយក្រសួងពាណិជ្ជកម្ម ពិព័រណ៍ពាណិជ្ជកម្មកម្ពុជា ការទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីនានា ដូចជាកិច្ចព្រមព្រៀងអាសិប កិច្ចព្រមព្រៀងពាណិជ្ជកម្មសេរីអាស៊ាន-អូស្រ្តាលី-នូវែលសេឡង់ និងការរៀបចំដំណើរទស្សនកិច្ចពិសេសរបស់ថ្នាក់ដឹកនាំក្រសួងពាណិជ្ជកម្មជាដើម។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី១០ ខែធ្នូ ឆ្នាំ២០២៤៕