ភ្នំពេញ៖ ក្រុមហ៊ុន Bridgemount Ltd. របស់អង់គ្លេស ចង់ពិនិត្យលទ្ធភាពវិនិយោគនៅកម្ពុជា តាមរយៈការចាប់ដៃគូជាមួយវិនិយោគិនក្នុងស្រុក ដើម្បីអនុវត្តគម្រោងវិនិយោគនៅក្នុងវិស័យសំខាន់ៗ ដូចជា៖ ហេដ្ឋារចនាសម្ព័ន្ធ, ឧស្សហកម្ម, សុខាភិបាល, ពាណិជ្ជកម្ម, កសិកម្ម, ថាមពលសូឡា និងការគ្រប់គ្រងសំណល់ជាដើម។ នេះជាលើកឡើងរបស់លោក Kalyan Ghosh នាយកគ្រប់គ្រង នៃក្រុមហ៊ុន Bridgemount Ltd. នាថ្ងៃទី០៧ ខែកុម្ភៈ ឆ្នាំ២០២៥។

ក្នុងជំនួបជាមួយឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា លោក Kalyan Ghosh បន្ថែមថា ក្រុមហ៊ុន ក៏មានគោលបំណងស្វែងយល់អំពីកាលានុវត្តភាពវិនិយោគ និងពិភាក្សាអំពីការផ្ដល់ហិរញ្ញប្បទានលើគម្រោងនានានៅកម្ពុជាផងដែរ។

ឯកឧត្តម សួន សុផល ក៏បានលើកឡើងអំពីបរិយាកាសវិនិយោគ ក៏ដូចជាកញ្ចប់លើកទឹកចិត្តផ្នែកសារពើពន្ធ និងការលើកទឹកចិត្តផ្នែកមិនមែនសារពើពន្ធ ដូចមានចែងក្នុងច្បាប់ស្តីពីវិនិយោគ និងអនុក្រឹត្យស្តីពីការអនុវត្តច្បាប់ស្តីពីវិនិយោគ។ ជាមួយគ្នានេះ ឯកឧត្តម សួន សុផល ក៏លើកទឹកចិត្តឱក្រុមហ៊ុនបន្តពិគ្រោះយោបល់ជាមួយក្រសួង ស្ថាប័នពាក់ព័ន្ធក្នុងគោលដៅសិក្សាសមិទ្ធិលទ្ធភាពលើគម្រោងវិនិយោគរបស់ក្រុមហ៊ុនផងដែរ៕