ភ្នំពេញ៖ វិន័យហិរញ្ញវត្ថុ គឺជាមូលដ្ឋានគ្រឹះដ៏សំខាន់សម្រាប់ស្ថិរភាព, កំណើន និងភាពធន់ទាំងក្នុងស្ថានភាពបុគ្គល និងអាជីវកម្ម ដែលគាំទ្រដល់ប្រព័ន្ធអេកូឡូស៊ីហិរញ្ញវត្ថុប្រកបដោយនិរន្តរភាព។ វិន័យហិរញ្ញវត្ថុនេះដែរ បានដើរតួនាទីយ៉ាងសំខាន់ក្នុងការបង្កើតទម្លាប់ទៀងទាត់លើការចំណាយ, ការសន្សំ និងការវិនិយោគ ដើម្បីធានានូវការគ្រប់គ្រងធនធានហិរញ្ញវត្ថុ និងភាពរឹងមាំផ្នែកសុខភាពហិរញ្ញវត្ថុរយៈពេលវែងប្រកបដោយប្រសិទ្ធភាព។ នេះបើតាមពុទ្ធិមូលបត្ររបស់និយ័តករមូលបត្រកម្ពុជា ចុះផ្សាយនាថ្ងៃទី០៦ ខែធ្នូ ឆ្នាំ២០២៤។

និយ័តករមូលបត្រកម្ពុជា បានឱ្យដឹងថា ដើម្បីសម្រេចបាននូវគោលដៅហិរញ្ញវត្ថុប្រកបដោយស្ថិរភាព និងនិរន្តរភាព ត្រូវមានគន្លឹះនៃការបង្កើតវិន័យហិរញ្ញវត្ថុ ដូចជា៖ ទី១.បង្កើតគម្រោងថវិកា មានន័យថាបង្កើតកំណត់ត្រាគម្រោងថវិកាលម្អិត ដែលកំណត់ពីគោលដៅនៃប្រភពចំណូល, ចំណាយ និងការសន្សំ ដើម្បីកំណត់បាននូវស្ថានភាពហិរញ្ញវត្ថុជាក់លាក់។ ទី២.បង្កើតគោលដៅហិរញ្ញវត្ថុ គឺត្រូវកំណត់គោលដៅហិរញ្ញវត្ថុរយៈពេលខ្លី និងរយៈពេលវែង ដើម្បីតម្រង់ទិសក្នុងការសម្រេចចិត្តផ្នែកហិរញ្ញវត្ថុ ប្រកបដោយប្រសិទ្ធភាព, ទី៣.កំណត់អាទិភាពលើការសន្សំ ត្រូវចេះបែងចែកផ្នែកនៃចំណូលសម្រាប់ការសន្សំ មុនពេលចំណាយលើវត្ថុដែលមិនចាំបាច់ ដើម្បីបង្កើតកញ្ចប់ថវិកាសុវត្តិភាព។

ចំពោះ ទី៤.ជៀសវាងការចំណាយតាមចំណង់ ត្រូវប្រកាន់ខ្ជាប់នូវផែនការថវិកា និងត្រូវគិតគូរដោយប្រុងប្រយ័ត្នពីភាពចាំបាច់មុននឹងចំណាយ, ទី៥.តាមដានការចំណាយ គឺត្រូវតាមដានការចំណាយជាប្រចាំ ដើម្បីជៀសវាងការចំណាយដែលមិនមានភាពចាំបាច់ និងបង្កើនប្រសិទ្ធភាពនៃការគ្រប់គ្រងហិរញ្ញវត្ថុ។

ចំណែក ទី៦.បង្កើតមូលនិធិសម្រាប់គ្រាមានអាសន្ន សន្សំថវិកាមួយចំនួនសម្រាប់រ៉ាប់រងលើការចំណាយ ដែលមិនអាចដឹងទុកជាមុន ដើម្បីកាត់បន្ថយការពឹងផ្អែកលើប្រាក់កម្ចី នៅពេលមានវិបត្តិហិរញ្ញវត្ថុដែលមិនបានរំពឹងទុកមុន។

ទី៧.ការគ្រប់គ្រងបំណុលដោយឆ្លាតវៃ គឺការកាត់បន្ថយការប្រើប្រាស់កាតឥណទានលើទំនិញដែលមិនចាំបាច់ ហើយទូទាត់បំណុលដែលមានស្រាប់ឱ្យបានទៀងទាត់តាមពេលវេលាកំណត់, ទី៨.វិនិយោគប្រកបដោយយុទ្ធសាស្ត្រ គឺរៀនពីការវិនិយោគ និងអនុវត្តយុទ្ធសាស្ត្រវិនិយោគនានា សម្រាប់រយៈពេលវែង ដើម្បីបង្កើនទ្រព្យសម្បត្តិ, ទី៩.ទទួលយកភាពសាមញ្ញ ត្រូវអនុវត្តការចំណាយដោយប្រុងប្រយ័ត្ន ជៀសវាងការចំណាយលើទំនិញប្រណិត ដែលមិនចាំបាច់។

រីឯ ទី១០.បន្តបង្កើនចំណេះដឹងផ្នែកហិរញ្ញវត្ថុ គឺស្វែងយល់បន្ថែមអំពីហិរញ្ញវត្ថុផ្ទាល់ខ្លួន, ការវិនិយោគ និងនិន្នាការសេដ្ឋកិច្ច ដើម្បីធ្វើសេចក្តីសម្រេចចិត្តផ្នែកហិរញ្ញវត្ថុឱ្យបានឆ្លាតវៃ។ គួរបញ្ជាក់ថា វិន័យហិរញ្ញវត្ថុទាមទារឱ្យប្រកាន់ខ្ជាប់នូវការប្រើប្រាស់ថវិកាតាមផែនការដែលបានគ្រោងទុក ជៀសវាងការបង្កើតបំណុលមិនចាំបាច់ និងការបែងចែកថវិកាមួយចំនួនសម្រាប់ធ្វើការវិនិយោគ ដែលវិន័យនេះជាជំនាញដ៏សំខាន់ដើម្បីសម្រេចបាននូវគោលដៅហិរញ្ញវត្ថុ៕