ភ្នំពេញ៖ ឯកឧត្តម Tull Traisorat ឯកអគ្គរាជទូតថៃប្រចាំកម្ពុជា ប្តេជ្ញាបំពេញបេសកកម្មនៅកម្ពុជា ដោយយកចិត្តទុកដាក់ ធ្វើយ៉ាងណាពង្រឹង និងពង្រីកទំនាក់ទំនងរវាងថៃ និងកម្ពុជា ឱ្យកាន់តែល្អប្រសើរជាពិសេសការកៀរគរអ្នកវិនិយោគរបស់ថៃ មកកម្ពុជា ឱ្យកាន់តែច្រើនបន្ថែមទៀត។ នេះបើតាមការចុះផ្សាយរបស់ សម្តេចតេជោ ហ៊ុន សែន។

ក្នុងជំនួបជាមួយ ឯកឧត្តម Tull Traisorat កាលពីថ្ងៃទី១១ ខែមីនា ឆ្នាំ២០២៥ សម្តេចតេជោ ហ៊ុន សែន បានលើកឡើងពីការពេញចិត្តចំពោះទំហំពាណិជ្ជកម្ម រវាងកម្ពុជា និងថៃ ដោយក្នុងឆ្នាំ២០២៤ បានកើនឡើងរហូត ១០ពាន់លានដុល្លារ ធៀបឆ្នាំ២០២៣ ដែលមានត្រឹម ៨ពាន់លានដុល្លារ។ ការកើនឡើងនេះបានបង្ហាញអំពីទំនាក់ទំនងពាណិជ្ជកម្ម ការវិនិយោគ រវាងប្រទេសទាំងពីរ។

បន្ថែមលើនេះ សម្ដេចតេជោ ក៏បានលើកឡើងពីកំណើនទេសចរណ៍រវាងប្រទេសទាំងពីរ ដែលក្នុងនោះកំណើនភ្ញៀវទេសចរថៃមកកាន់ប្រទេសកម្ពុជា មានការកើនឡើង ដែលឆ្នាំ២០២៤ មានរហូតដល់ ២លាននាក់ ឈរនៅលំដាប់ទី១ ក្នុងចំណោមទេសចរណ៍បរទេស។ សម្ដេចតេជោ ហ៊ុន សែន លើកឡើងបន្តថា សម្រាប់ទេសចរណ៍កម្ពុជាទៅប្រទេសថៃវិញគឺ ប្រមាណ ៥៥ម៉ឺននាក់ ក្នុងឆ្នាំ២០២៤ ដែលនេះបង្ហាញអំពីទំនាក់ទំនងដ៏ល្អប្រសើររវាងប្រទេសទាំងពីរផងដែរ៕