ភ្នំពេញ៖ ក្រុមហ៊ុនកូរ៉េ HYUCKJIN ENERGY PLANT ENGINEERING បានស្នើសុំវិនិយោគលើការផលិតថាមពលអគ្គិសនី តាមរយៈការកែច្នៃសំរាម ដោយប្រើប្រាស់បច្ចេកវិទ្យាបង្កើតថាមពលអគ្គិសនី យ៉ាងតិចបំផុត ២៤មេហ្គាវ៉ាត់ ពីការដុតសំរាមប្រមាណ ១០០តោន ក្នុងមួយថ្ងៃ នៅកម្ពុជា។ នេះជាការលើកឡើងរបស់គណៈប្រតិភូក្រុមហ៊ុនកូរ៉េ HYUCKJIN ENERGY PLANT ENGINEERING នាថ្ងៃទី១៣ ខែឧសភា ឆ្នាំ២០២៤។

ក្នុងជំនួបពិភាក្សាជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា គណៈប្រតិភូក្រុមហ៊ុនកូរ៉េ ក៏បានស្នើសុំការណែនាំបន្ថែមលើគម្រោងផលិតថាមពលអគ្គិសនី តាមរយៈការកែច្នៃសំរាម ពីឯកឧត្តមឧបនាយករដ្ឋមន្ត្រីផងដែរ។ នាឱកាសនោះ ឯកឧត្តម ស៊ុន ចាន់ថុល បានស្វាគមន៍ក្រុមហ៊ុន និងវិនិយោគិនទាំងអស់ ចំពោះគម្រោងវិនិយោគកែច្នៃសំរាម ដើម្បីទាញយកថាមពលអគ្គិសនីមកប្រើប្រាស់នេះ ព្រមទាំងបានស្នើសុំព័ត៌មានលម្អិតទាំងស្រុងនៃគម្រោង ដើម្បីឱ្យស្ថាប័នរដ្ឋាភិបាលសម្របសម្រួលអនុវត្តនីតិវិធីបន្ត៕