ភ្នំពេញ៖ ឯកឧត្តម ម៉ី វ៉ាន់ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ (ក.ស.ហ.វ.) និងជាអគ្គលេខាធិការ នៃអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) ត្រូវបានតែងតាំងជាប្រធានសមាសភាពក្រុមការងារ លើកកម្ពស់ការអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ។ ការតែងតាំងនេះ ធ្វើឡើងកាលពីថ្ងៃទី១ ខែសីហា ឆ្នាំ២០២៤។

សេចក្តីសម្រេចស្តីពីការតែងតាំងរបស់អាជ្ញាធរសេវាហិរញ្ញវត្ថុមិនមែនធនាគារ បញ្ជាក់ថា អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បានសម្រេចតែងតាំងសមាសភាពក្រុមការងារអន្តរក្រសួងស្ថាប័នចំនួន ៦៣រូប ដើម្បីលើកកម្ពស់ការអភិវឌ្ឍបច្ចេកវិទ្យាហិរញ្ញវត្ថុ ក្នុងវិស័យហិរញ្ញវត្ថុមិនមែនធនាគារ។

សមាសភាពក្រុមការងារចំនួន ៦៣នាក់ រួមមានប្រធានចំនួន ១រូប អនុប្រធានចំនួន ១៥រូប និងសមាជិកមានចំនួន ៤៧រូប។ អគ្គលេខាធិការនៃអគ្គលេខាធិការដ្ឋាន អ.ស.ហ. , អគ្គនាយកនៃនិយ័តករក្រោមឱវាទ អ.ស.ហ. និងប្រធានអង្គភាពពាក់ព័ន្ធ ព្រមទាំងសាមីខ្លួនទាំង ៦៣រូប ដែលបានតែងតាំងលើកកម្ពស់ការអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារនេះ ត្រូវទទួលបន្ទុកអនុវត្តតាមសេចក្តីសម្រេចនេះ តាមភារកិច្ចរៀងៗខ្លួន ចាប់ពីថ្ងៃទី១ ខែសីហា ដែលជាថ្ងៃចុះហត្ថលេខានេះតទៅ៕