ភ្នំពេញ៖ ធនាគារជាតិនៃកម្ពុជា តួនាទីជាសារវន្ត និងសកម្មក្នុងការជំរុញ និងកៀរគរប្រភពហិរញ្ញប្បទានសម្រាប់គាំទ្រដល់គោលដៅ សម្រេចឱ្យបានគោលដៅសកលឆ្នាំ២០៥០ ស្តីពីអព្យាក្រឹតកាបូន។ នេះបើតាមការលើកឡើងរបស់ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា។

លោកជំទាវបណ្ឌិត ជា សិរី បានលើកឡើងពីការដាក់ចេញនូវគោលនយោបាយ និងយុទ្ធសាស្រ្តចាំបាច់ជាច្រើនរបស់រដ្ឋាភិបាលកម្ពុជា។ បើតាមការបញ្ជាក់របស់ លោកជំទាវបណ្ឌិត ជា សិរី គោលនយោបាយ និងយុទ្ធសាស្រ្តទាំងនេះ គឺដើម្បីបង្កើនសកម្មភាពកាត់បន្ថយនិងបន្សាំជាមួយការប្រែប្រួលអាកាសធាតុ សម្រេចឱ្យបានគោលដៅសកលឆ្នាំ២០៥០ ស្តីពីអព្យាក្រឹតកាបូន។

សូមជម្រាបផងដែរថា ប្រសាសន៍របស់ លោកជំទាវបណ្ឌិត ជា សិរី គឺធ្វើឡើងក្នុងឱកាសចូលរួមជា វាគ្មិនកិត្តិយសក្នុងកិច្ចពិភាក្សាតុមូល ក្រោមប្រធានបទស្តីពី «ហិរញ្ញវត្ថុអន្តរកាល សម្រាប់អនាគតនៃការបន្ថយឧស្ម័នកាបូនិចដល់កម្រិតសូន្យ» អំឡុវពេលវេទិកាបូអាវសម្រាប់អាស៊ី (Boao Forum for Asia) ប្រចាំឆ្នាំ២០២៥ កាលពីថ្ងៃទី២៧ ខែមីនា ឆ្នាំ២០២៥ ក្នុងខេត្តហៃណាន ប្រទេសចិន៕