ភ្នំពេញ៖ ក្រសួងសាធារណការ និងដឹកជញ្ជូន ចុះអនុស្សរណៈយោគយល់(MoU) ជាមួយស្ថាប័ន China Federation of Logistics and Purchasing (CFLP) ចំនួន ៣ចំណុច ដើម្បីជំរុញការអភិវឌ្ឍវិស័យភស្តុភារកម្ម។ ការចុះ MOU ចំនួន ៣ចំណុច ដើម្បីពង្រឹងកិច្ចសហប្រតិបត្តិការរវាងអគ្គនាយកដ្ឋានភស្តុភារកម្ម និង CFLP មានដូចជា៖ ១.ចែករំលែកព័ត៌មានរវាងស្ថាប័នទាំងពីរ, ២.កិច្ចសហការក្នុងការរៀបចំពិព័រណ៍ World International Freight Forwarding Alliance (WIFFA) Branch ប្រចាំឆ្នាំ និង៣.កិច្ចសហការក្នុងការកំណត់ និងការរៀបចំគម្រោងនានា។

ក្នុងពិព័រណ៍ពិភពលោកលើកទី១៩ នៃសហព័ន្ធបញ្ជូនទំនិញអន្តរជាតិ (WIFFA EXPO-2024) នាថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តម ហេង ណន រដ្ឋលេខាធិការក្រសួងសាធារណការ បានអំពាវនាវដល់ក្រុមហ៊ុនចិនឱ្យមកវិនិយោគនៅប្រទេសកម្ពុជា ដើម្បីជំរុញឱ្យកម្ពុជាក្លាយទៅជា Regional Hub។ ជាមួយគ្នានេះ ឯកឧត្តម ហេង ណន បានលើកឡើងថា កម្ពុជា មានឧត្តមភាពប្រៀបធៀប (Comparative Advantage) ដូចជា៖ ទីតាំងយុទ្ធសាស្រ្តនៅចំកណ្តាលតំបន់អាស៊ីអាគ្នេយ៍, ច្បាប់វិនិយោគដែលមានលក្ខណៈសេរីជាងគេក្នុងតំបន់, ហេដ្ឋារចនាសម្ព័ន្ធតភ្ជាប់ក្នុងប្រទេស និងក្នុងតំបន់ ពិសេសនោះ កម្ពុជាមានរដ្ឋាភិបាលដែលគាំទ្រវិនិយោគិន។

រដ្ឋលេខាធិការក្រសួងសាធារណការ បានបន្តថា ឧត្តមភាពប្រៀបធៀបទាំងអស់នេះហើយ ទើបកម្ពុជា ជាទីតាំងល្អបំផុតសម្រាប់មជ្ឈមណ្ឌលដឹកជញ្ជូន និងមជ្ឈមណ្ឌលភស្តុភារកម្មនៅក្នុងតំបន់។ គួរបញ្ជាក់ថា ពិព័រណ៍ WIFFA EXPO-2024 រៀបចំឡើងដើម្បីជាថ្នាល (Platform) សម្រាប់ផ្តល់ឱកាសឱ្យក្រុមហ៊ុនដឹកជញ្ជូន និងឡូជីស្ទីក បានជួបពិភាក្សាគ្នា និងបង្កើតបណ្តាញធុរកិច្ចនៅក្នុងក្របខ័ណ្ឌតំបន់ និងពិភពលោក។ កម្មវិធីនេះ មានចំនួនអ្នកតាំងពិព័រណ៍ប្រមាណ ២ពាន់នាក់ និងអ្នកចូលរួម ៥ម៉ឹននាក់ រួមមាន៖ ក្រុមហ៊ុនដឹកជញ្ជូនតាមផ្លូវគោក ផ្លូវសមុទ្រ ផ្លូវដែក ផ្លូវអាកាស និងកំពង់ផែ ប្រតិបត្តិករឃ្លាំង ប្រតិបត្តិករភស្តុភារកម្ម និងក្រុមហ៊ុននានាក្នុងវិស័យយានយន្ត ថាមពល និងធនាគារ មកពីបណ្តាប្រទេសនានាជាង ១០០ប្រទេស៕