ភ្នំពេញ៖ អង្គភាពគយនិងរដ្ឋាករ នៃអគ្គនាយកដ្ឋានគយ និងរដ្ឋាករកម្ពុជា បានសហការជាមួយសមត្ថកិច្ចពាក់ព័ន្ធ បានបង្ក្រាបនិងដុតកម្ទេចចោលទំនិញហាមឃាត់នាំចូលពីវៀតណាម និងថៃ ដែលជាបំណែកសាច់បង្កកចំនួន ២ករណី ស្មើនឹង ៤ ៣២៩គីឡូក្រាម កាលពីថ្ងៃទី២៩ ខែមិថុនា ឆ្នាំ២០២៤។ នេះបើតាមការចុះផ្សាយអគ្គនាយកដ្ឋានគយ និងរដ្ឋាករកម្ពុជា នាថ្ងៃទី៣០ មិថុនា។

ករណីចំនួន២ ដែលអង្គភាពគយនិងរដ្ឋាករ នៃអគ្គនាយកដ្ឋានគយ ដុតកម្ទេចចោលនោះ រួមមាន៖ ទី១. ចុងស្លាបមាន់២២៥ គីឡូក្រាម ដែលត្រូវបានមន្ត្រីការិយាល័យគយនិងរដ្ឋាករដូង នៃសាខាគយនិងរដ្ឋាករខេត្តបាត់ដំបង បង្ក្រាបនិងដកហូតពីឈ្មួញដែលលួចលាក់បង្កប់ក្នុងទំនិញដទៃនាំចូលពីប្រទេសថៃ តាមផែស្ងួតដូង។

ចំពោះ ករណីទី២. មឹក ១ ២១០គីឡូក្រាម, ពោះវៀនជ្រូក ១ ៩៧០គីឡូក្រាម និងជើងមាន់ ៩២៤ គីឡូក្រាម ត្រូវបានមន្ត្រីការិយាល័យគយនិងរដ្ឋាករដូង នៃសាខាគយនិងរដ្ឋាករខេត្តស្វាយរៀង និងមន្ត្រីការិយាល័យស្រាវជ្រាវនិងបង្ក្រាបអំពើរត់ពន្ធតំបន់២ នៃនាយកដ្ឋានបង្ការនិងបង្ក្រាបបទល្មើស សហការជាមួយមន្ត្រីកងរាជអាវុធហត្ថលើផ្ទៃប្រទេស និងមន្ត្រីនគរបាល បង្ក្រាបបានតាមរយៈម៉ូតូសណ្តោងរ៉ឺម៉ក ៣ គ្រឿង លួចលាក់នាំចូលពីប្រទេសវៀតណាម តាមមាត់ច្រករបៀង៕