ភ្នំពេញ៖ ការធ្វើកំណែទម្រង់«ការគ្រប់គ្រងហិរញ្ញវត្ថុសាធារណៈ» គឺដើម្បីបង្កើនភាពសន្សំសំចៃ ប្រសិទ្ធភាព ប្រសិទ្ធផល នៃការធ្វើផែនការ និងការផ្តល់សេវាសាធារណៈ។ នេះបើតាមការលើកឡើងរបស់ ឯកឧត្តម ង៉ូវ បូរីណា រដ្ឋលេខាធិការក្រសួងបរិស្ថាន ដោយឯកឧត្តម បន្តថា សវនកម្មនឹងត្រូវអនុវត្តបច្ចេកទេសថ្មីៗ ដើម្បីឱ្យទាន់សភាពការ និងការណែនាំរបស់ក្រសួងសេដ្ឋកច្ច និងហិរញ្ញវត្ថុ។

ក្នុងពិធីបើកវគ្គបណ្តុះបណ្តាលស្តីពី «ការអនុវត្តសវនកម្មជាក់ស្តែង និងសវនកម្មសមិទ្ធកម្ម» ឯកឧត្តម ង៉ូវ បូរីណា មានប្រសាសន៍ថា ក្រសួងបរិស្ថាន បានអនុវត្តយុទ្ឋសាស្រ្តចតុកោណ ដំណាក់កាលទី៤ របស់រាជរដ្ឋាភិបាល ដោយអនុវត្តកម្មវិធីកំណែទម្រង់ហិរញ្ញវត្ថុសាធារណៈនៅឆ្នាំ២០០៤ ក្នុងគោលដៅប្រែក្លាយប្រព័ន្ធ គ្រប់គ្រងហិរញ្ញវត្ថុសាធារណៈនៅកម្ពុជា ជាជំហានៗ ឱ្យទៅជាប្រព័ន្ធគ្រប់គ្រងហិរញ្ញវត្ថុសាធារណៈ ស្របតាមបទដ្ឋាន និងឧត្តមានុវត្តជាតិ។ ឯកឧត្តម ង៉ូវ បូរីណា បញ្ជាក់ថា ការអនុវត្តបែបនេះ គឺដើម្បីសម្រេចបានប្រសិទ្ធភាពគោលដៅ និងយុទ្ធសាស្រ្តរបស់ក្រសួងក្នុងការអនុវត្តយុទ្ធសាស្រ្តចក្រា ដែលឈានទៅសុក្រឹត្យកម្មបរិស្ថានកិច្ច និងអព្យាក្រឹត្យកាបូន នាពេលខាមុខ។

ការអនុវត្តកម្មវិធីកែទម្រង់ហិរញ្ញវត្ថុសាធារណៈ ត្រូវបានកែទម្រង់ក្នុងរយៈពេលវែង និងមានលក្ខណៈគ្រប់ជ្រុងជ្រោយ ដោយត្រូវបានកំណត់ជា ៤ដំណាក់កាល គឺ៖ ដំណាក់កាលទី១ ការបង្កើនភាពជឿទុកចិត្តនៃថវិកា (២០០៥-២០០៨), ដំណាក់កាលទី២ ការបង្កើនគណនេយ្យភាពហិរញ្ញវត្ថុ (២០០៩-២០១៥)។ ចំពោះដំណាក់កាលទី៣ ជាការផ្សារភ្ជាប់ថវិកាទៅនឹងគោលនយោបាយ(២០១៦-២០២០) និងដំណាក់កាលទី៤ ការបង្កើនគណនេយ្យភាសមិទ្ឋកម្ម (២០២១-២០២៥)។

សូមបញ្ជាក់ថា វគ្គបណ្តុះបណ្តាលខាងលើ រៀបចំឡើងដោយនាយកដ្ឋានសវនកម្មផ្ទៃក្នុង ក្នុងគោលដៅធានាឱ្យការកែទម្រង់នៅតាមក្រសួង-ស្ថាប័ន ទទួលបានជោគជ័យ នូវមុខងារសវនកម្មផ្ទៃក្នុង ដែលត្រូវបានបង្កើត និងអនុវត្តក្នុងគុណភាពឧត្តមានុវត្តន៍កម្រិតខ្ពស់ រួមទាំងរក្សាបាននូវសង្គតិភាព និងភាពសុខដុមនៅតាមក្រសួង ស្ថាប័ន និងអង្គភាពសាធារណៈ របស់រាជរដ្ឋាភិបាលកម្ពុជា៕