ភ្នំពេញ៖ ក្រុមហ៊ុនចំនួន ៤របស់សាធារណរដ្ឋឆែក កំពុងមានចំណាប់អារម្មណ៍នឹងពិនិត្យលទ្ធភាពបណ្ដាក់ទុនវិនិយោគនៅកម្ពុជា លើវិស័យមានជាអាទិ៍ការផលិតឧបករណ៍វេជ្ជសាស្រ្ត ការសិក្សាស្រាវជ្រាវ និងការផលិតទឹកស្អាតជាដើម។ នេះជាការលើកឡើងរបស់លោក Jiří Kozák អនុរដ្ឋមន្ត្រីការបរទេស នៃសាធារណរដ្ឋឆែក។

ក្នុងជំនួបពិភាក្សារវាងលោក Jiří Kozák និងឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នាថ្ងៃទី៧ ខែវិច្ឆិកា ឆ្នាំ២០២៤ ភាគីទាំងពីរក៏បានបង្ហាញចំណាប់អារម្មណ៍អំពីទំនាក់ទំនងទ្វេភាគី និងកិច្ចសហប្រតិបត្តិការងារនានាសម្រាប់ពង្រឹងទំនាក់ទំនងឱ្យកាន់តែស៊ីជម្រៅ ពិសេសតាមរយៈកិច្ចការងារវិនិយោគឯកជន៕