ភ្នំពេញ៖ ក្រុមហ៊ុន DONGJIANG ENVIRONMENT CO., LTD របស់ចិន មានគោលបំណងមកទស្សនកិច្ចសិក្សានៅកម្ពុជា នាពេលខាងមុខ ដើម្បីស្វែងយល់ឱកាសវិនិយោគបង្កើនផលិតកម្មចម្រោះជាតិពុលឧស្សាហកម្មនៅកម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១០ ខែវិច្ឆិកា ឆ្នាំ២០២៤។

គម្រោងវិនិយោគរបស់ក្រុមហ៊ុនចិនខាងលើ គឺធ្វើឡើងនាពេល លោក ឡៅ ងូន អេង អនុព័ន្ធពាណិជ្ជកម្មអមស្ថានអគ្គកុងស៊ុលកម្ពុជាប្រចាំទីក្រុងក្វាងចូវ នៃខេត្តក្វាងទុង ប្រទេសចិន ចុះទស្សកិច្ចនៅរោងចក្រចម្រោះជាតិពុលគីមីឧស្សាហកម្ម ដើម្បីពិនិត្យខ្សែច្រវាក់ផលិតកម្មរបស់ក្រុមហ៊ុន DONGJIANG ENVIRONMENT CO., LTD។ គួរបញ្ជាក់ថា ក្រុមហ៊ុន DONGJIANG ENVIRONMENT CO., LTD មានខ្សែច្រវាក់ផលិតកម្មជាប់លំដាប់លេខមួយលើជំនាញចម្រោះជាតិពុលឧស្សាហកម្ម នៅទីក្រុងស៊ិនជិន នៃខេត្តក្វាងទុង៕