ភ្នំពេញ៖ «ព្រែកជីកហ្វូណនតេជោ» គឺជាព្រែកជីកដែលផ្តួចផ្តើមគំនិតទាំងស្រុងដោយភាគីកម្ពុជា។ ចិនមិនបានដឹងរឿងនេះទេ យើងគ្រាន់តែបានពិភាក្សានិងឱ្យមានការចូលរួមនៅក្នុងការសិក្សា ហើយយើងស្វះស្វែងរកក្រុមហ៊ុនចិន ដើម្បីមកវិនិយោគរួមគ្នាជាមួយនឹងកម្ពុជា ក្នុងគម្រោងជីកព្រែកមួយនេះ។

សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ថ្លែងសារតាមរយៈការផ្សាយផ្ទាល់នៅលើបណ្តាញសង្គមហ្វេសប៊ុករបស់សម្តេច នៅថ្ងៃទី១៦ ខែឧសភា ឆ្នាំ២០២៤នេះ ដើម្បីឆ្លើយតបទៅនឹងអ្នកដែលចោទប្រកាន់កម្ពុជាលើការសាងសង់គម្រោងព្រែកជីកនេះថាពាក់ព័ន្ធនឹងភូមិសាស្រ្តនយោបាយ និងអ្នកដែលមានទំនោរប្រឆាំងនឹងប្រទេសចិន។ សម្តេចតេជោ ហ៊ុន សែន បានបញ្ជាក់ថា គំនិតផ្តួចផ្តើមលើគម្រោង«ព្រែកជីកហ្វូណនតេជោ»នេះ គឺចេញពីកម្ពុជាសុទ្ធសាធ មិនស្ថិតនៅក្នុងក្របខ័ណ្ឌនៃគម្រោងខ្សែក្រវាត់មួយ និងផ្លូវមួយ របស់ចិននោះទេ។

គំនិតផ្តួចដើមរបស់កម្ពុជាលើគម្រោងសង់ព្រែកជីកហ្វូណតេជោ នេះ សម្តេចតេជោប្រធានព្រឹទ្ធសភាកម្ពុជា អះអាងថា ដើម្បីជាផលចំណេញសេដ្ឋកិច្ច និងឯករាជ្យភាពផ្នែកនយោបាយលើការដឹកជញ្ជូនតាមផ្លូវទឹករបស់កម្ពុជានេះឯង។

សូមជម្រាបផងដែរថា គម្រោងផ្លូវទឹក«ព្រែកជីកហ្វូណនតេជោ» មានប្រវែង ១៨០ គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន ៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាពលរដ្ឋសរុបប្រមាណ ១.៦លាននាក់ រស់នៅអមសងខាងផ្លូវទឹក។ ការសាងសង់គម្រោងផ្លូវទឹកពីទន្លេឆ្ពោះទៅសមុទ្ររបស់កម្ពុជា នេះ ត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារអាម៉េរិក និងប្រើរយៈពេលសាងសង់ប្រមាណ ៤ឆ្នាំ៕ https://www.youtube.com/watch?v=CM7vlfKB-cA