ភ្នំពេញ៖ រដ្ឋបាលខណ្ឌដូនពេញ បានផាកពិន័យបុរសចំណាស់ម្នាក់ចំនួន ៤០ម៉ឺនរៀល ដែលបានចាក់សំរាមចូលតាមទឹកហូរពេលភ្លៀងធ្លាក់ កាលពីថ្ងៃទី០៨ ខែសីហា ឆ្នាំ២០២៤។ ការផាកពិន័យនេះ ធ្វើឡើងក្រោយរដ្ឋបាលខណ្ឌដូនពេញ ទទួលបានព័ត៌មានដែលចែកចាយនៅតាមបណ្តាញសង្គម បានបង្ហោះវីដេអូពីសកម្មភាពបុរសចំណាស់ម្នាក់ បានចាក់សំរាមពីក្នុងធុងសំរាមចូលក្នុងទឹកហូរ។

រដ្ឋបាលខណ្ឌដូនពេញ ក៏បានសាកសួរបុរសចំណាស់ នាថ្ងៃទី០៩ ខែសីហា ឆ្នាំ២០២៤ វេលាម៉ោង ១០:០០នាទីព្រឹកពាក់ព័ន្ធនឹងរឿងខាងលើ ដែលក្នុងនោះគាត់ បានអះអាងទទួលស្គាល់ថាបានចាក់សំរាមចូលតាមទឹកហូរពេលភ្លៀងធ្លាក់កាលពីម្សិលមិញពិតប្រាកដមែន។

រដ្ឋបាលខណ្ឌដូនពេញ ក៏បានណែនាំមិនឱ្យចាក់សំរាមពាសវាលពាសកាល និងត្រូវរៀបចំទុកដាក់សំរាមឱ្យមានរបៀបរៀបរយ ហើយការផាកពិន័យបុរសចំណាស់ជាទឹកប្រាក់ចំនួន ៤០០ ០០០រៀលនេះ គឺស្របតាមមាត្រាទី៤២ ជំពូកទី៧ នៃអនុក្រឹត្យលេខ ១១៣ អនក្រ.បក របស់ក្រសួងបរិស្ថាន៕