ភ្នំពេញ៖ ក្នុងត្រីមាសទី២ ឆ្នាំ២០២៤ គ្រឹះស្ថានមីក្រូហិរញ្ញវត្ថុចំនួន៣០ បានផ្តល់សេវាឥណទានក្នុងទំហំទឹកប្រាក់ប្រមាណ ៤៣២លានដុល្លារ ដល់ពលរដ្ឋ ១១៣,២៦៨គ្រួសារ នៅខេត្តតាកែវ។ នេះបើតាមការលើកឡើងរបស់ លោកជំទាវ ឌិត នីតា ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា នៅក្នុងសិក្ខាសាលាមួយនៅខេត្តតាកែវ កាលថ្ងៃទី៩ ខែតុលា ឆ្នាំ២០២៤។

ក្រៅពីកម្ចី ពលរដ្ឋចំនួន ១៤៨,០៣៣នាក់ ដែលរស់នៅខេត្តតាកែវ ក៏មានប្រាក់បញ្ញើសរុបចំនួន ៧៤លានដុល្លារ នៅគ្រឹះស្ថានមីក្រូហិរញ្ញវត្ថុចំនួន៣០ ផងដែរ។ លោកជំទាវ ឌិត នីតា បានបញ្ជាក់នៅក្នុងសិក្ខាសាលាស្តីពី «វិស័យមីក្រូហិរញ្ញវត្ថុនៅកម្ពុជា» នៅខេត្តតាកែវ កាលថ្ងៃទី៩ តុលា ថា ទិន្នន័យទាំងនេះ គឺមិនបានរាប់បញ្ចូលគ្រឹះស្ថានធនាគារនោះទេ។

សូមជម្រាបថា សិក្ខាសាលាស្តីពី «វិស័យមីក្រូហិរញ្ញវត្ថុនៅកម្ពុជា» ធ្វើឡើងក្នុងគោលបំណងផ្សព្វផ្សាយអំពីស្ថានភាព វឌ្ឍនភាព បញ្ហាប្រឈម និងដំណោះស្រាយ នៃវិស័យមីក្រូហិរញ្ញវត្ថុនៅក្នុងប្រទេសកម្ពុជា ក៏ដូចជាខេត្តតាកែវ ព្រមទាំងផ្សព្វផ្សាយចំណេះដឹងផ្នែកហិរញ្ញវត្ថុដល់អ្នកចូលរួមផងដែរ។ នេះបើតាមការចុះផ្សាយរបស់សមាគមមីក្រូហិរញ្ញវត្ថុកម្ពុជា នាថ្ងៃទី១៤ តុលា៕