ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានជំរុញឱ្យក្រុមហ៊ុន Yunnan Investment Holding Group Co., Ltd (YIG) បង្កើនការអភិវឌ្ឍវិស័យទេសចរណ៍កម្ពុជា ពិសេសការវិនិយោគថ្មីៗក្នុងវិស័យទេសចរណ៍ នៅខេត្តសៀមរាប។ នេះបើតាមការចុះផ្សាយរបស់ក្រសួងទេសចរណ៍ កាលពីថ្ងៃទី៦ ខែវិច្ឆិកា ឆ្នាំ២០២៤។

ក្នុងគ្រាបំពេញទស្សនកិច្ចនៅទីស្នាក់កណ្តាលនៃក្រុមហ៊ុន YIG ដែលដឹកនាំដោយ ឯកឧត្តម ហួត ហាក់ លោក Liu Minglin ប្រធានក្រុមហ៊ុន YIG បានបញ្ជាក់ថា ក្រុមហ៊ុន YIG ជាក្រុមហ៊ុនដ៏ធំបំផុតក្នុងខេត្តយូណាន និងឈានមុខមួយក្នុងប្រទេសចិន ព្រមទាំងមានទុនវិនិយោគរាប់ពាន់លានដុល្លារក្នុងការបណ្តាក់ទុកវិនិយោគលើវិស័យទេសចរណ៍នៅកម្ពុជា។ លើសពីនេះ លោក Liu Minglin នឹងចាត់ក្រុមការងារជំនាញរបស់ក្រុមហ៊ុន ឱ្យចុះទៅសិក្សាផ្ទាល់លើសក្តានុពលកម្ពុជា ក្នុងពេលដ៏ឆាប់ខាងមុខនេះ។

ឯកឧត្តមរដ្ឋមន្រ្តីក្រសួងទេសចរណ៍ បានស្វាគមន៍រាល់ការវិនិយោគលើវិស័យទេសចរណ៍នៅកម្ពុជា និងបានស្នើឱ្យប្រធានក្រុមហ៊ុនលោក Liu Minglin រៀបចំគម្រោងវិនិយោគខាងលើនេះឱ្យបានរួចរាល់ និងបញ្ជូនមករាជរដ្ឋាភិបាលកម្ពុជា ដើម្បីពិនិត្យ និងសម្រេច។ ឯកឧត្តមរដ្ឋមន្រ្តី ក៏បានស្នើឱ្យប្រធានក្រុមហ៊ុន YIG ពង្រឹងទំនាក់ទំនងជាមួយវិស័យឯកជនកម្ពុជា និងកៀរគរអ្នកវិនិយោគមកបណ្តាក់ទុនលើការអភិវឌ្ឍន៍វិស័យទេសចរណ៍កម្ពុជាឱ្យបានច្រើនផងដែរ៕