ភ្នំពេញ៖ ក្រសួងពាណិជ្ជកម្ម នាយកដ្ឋានពាក់ព័ន្ធ សមាគមសហព័ន្ធស្វាយចន្ទីកម្ពុជា និងសមាគមស្វាយចន្ទីកម្ពុជា បានសម្រេចបង្កើត«ម៉ាកសមូហភាពផលិតផលស្វាយចន្ទីកម្ពុជា» ដើម្បីអភិវឌ្ឍន៍ផលិតកម្មកែច្នៃ និងជំរុញការប្រកួតប្រជែងប្រកបដោយបរិយាប័ន្ន ធានានូវនិរន្តរភាពស្វាយចន្ទីកម្ពុជា។

ការសម្រេចបង្កើត«ម៉ាកសមូហភាពផលិតផលស្វាយចន្ទីកម្ពុជា» នេះ គឺស្របតាមផែនការការងារ ដែលមានចែងក្នុងគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ និងការធ្វើពិពិធកម្មសេដ្ឋកិច្ចប្រែក្លាយកម្ពុជាជាប្រទេសនាំចេញគ្រាប់ស្វាយចន្ទីច្រើនជាងគេលើពិភពលោក។ នេះបើតាមការឱ្យដឹងក្នុងកិច្ចប្រជុំពិភាក្សា ដែលដឹកនាំដោយ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម និងជាអនុប្រធានអចិន្ត្រៃយ៍នៃគណៈកម្មការអន្តរក្រសួងតាមដាន និងវាយតម្លៃការអនុវត្តគោលនយោបាយជាតិស្ដីពីស្វាយចន្ទី ឆ្នាំ២០២២-២០២៧។

តាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី៥ ខែវិច្ឆិកា ឆ្នាំ២០២៤ ភាគីពាក់ព័ន្ធក្នុងកិច្ចប្រជុំ បានសម្រេចឱ្យនាយកដ្ឋានកម្មសិទ្ធិបញ្ញា រៀបចំបន្តនីតិវិធីបង្កើត «ម៉ាកសមូហភាពផលិតផលស្វាយចន្ទីកម្ពុជា» នេះ៕