ភ្នំពេញ៖ ដើមទុនអប្បបរមាសម្រាប់ការវិនិយោគ គឺមិនត្រូវបានកំណត់ឡើយ ប៉ុន្តែវិនិយោគិនត្រូវមានទឹកប្រាក់ស្មើនឹងថ្លៃមូលបត្របូកជាមួយកម្រៃជើងសា គឺ០,៤៥%-០,៤៧% ដើម្បីបង់ទៅក្រុមហ៊ុនមូលបត្រ។ កម្រៃជើងសានេះ នឹងត្រូវគិតនៅពេលដែលបញ្ជារបស់វិនិយោគិន ត្រូវបានផ្គូរផ្គងជោគជ័យ។

នៅក្នុងប៉ុស្តិ៍មូលបត្រចំណេះដឹងមូលដ្ឋាន លេខ១០ របស់និយ័តករមូលបត្រកម្ពុជា ដែលចេញផ្សាយថ្ងៃទី៣១ ខែតុលា ឆ្នាំ២០២៤ ស្តីអំពីមគ្គុទ្ទេសក៍សម្រាប់យុវវ័យក្នុងការចាប់ផ្តើមវិនិយោគក្នុងទីផ្សារភាគហ៊ុននៅកម្ពុជា បានលើកជាឧទាហរណ៍ថា បើសិនវិនិយោគិនទិញមូលបត្រកម្មសិទ្ធិ ឬភាគហ៊ុនរបស់ក្រុមហ៊ុន ម៉េងលី ជេ. គួច អេឡូខេសិន មានតម្លៃ ២,០៥០រៀល នៅថ្ងៃទី២៨ ខែតុលា ឆ្នាំ២០២៤។ ដូច្នេះ ដើម្បីអាចទិញភាគហ៊ុននេះបាន វិនិយោគិនត្រូវមានទឹកប្រាក់ ២,១៤៥រៀល ពោលគឺវិនិយោគិនត្រូវមានទឹកប្រាក់ស្មើនឹងថ្លៃមូលបត្របូកជាមួយកម្រៃជើងសា។

គួរបញ្ជាក់ថា ដើម្បីអាចជួញដូរនៅផ្សារមូលបត្រកម្ពុជា វិនិយោគិនត្រូវមានចំណេះដឹងមូលដ្ឋានអំពីវិស័យមូលបត្រ អត្ថប្រយោជន៍ និងការគ្រប់គ្រងហានិភ័យ ដើម្បីអាចសម្រេចចិត្តវិនិយោគដ៏ត្រឹមត្រូវ។ វិនិយោគិន អាចទទួលបានចំណេះដឹងទាំងនេះ ពីការចូលរួមសិក្ខាសាលា ឬវគ្គបណ្តុះបណ្តាលនានា ដែលរៀបចំដោយនិយ័តករមូលបត្រកម្ពុជា ដើម្បីស្វែងយល់ និងបង្កើននូវចំណេះដឹងបន្ថែមពាក់ព័ន្ធ នឹងវិស័យមូលបត្រ៕