ភ្នំពេញ៖ ក្រសួងពាណិជ្ជកម្ម នឹងរៀបចំ «ពិព័រណ៍ពាណិជ្ជកម្មកម្ពុជា» ក្រោមមូលបទ «យុគសម័យថ្មីនៃពាណិជ្ជកម្ម (Trade Renaissance)» នាថ្ងៃទី១៣-១៦ ខែធ្នូ ឆ្នាំ២០២៤ ដើម្បីលើកកម្ពស់សកម្មភាពពាណិជ្ជកម្មនិងវិនិយោគ លើកកម្ពស់តួនាទីវិស័យឯកជន និងផ្សារភ្ជាប់ទំនាក់ទំនងពាណិជ្ជកម្មអន្តរជាតិ។

ពិព័រណ៍ពាណិជ្ជកម្ម ដែលនឹងបើកសម្ពោធក្រោមអធិបតីភាពសម្តេចធិបតី ហ៊ុន ម៉ាណែត ក្រសួងពាណិជ្ជកម្ម បញ្ជាក់ថា នឹងមានស្តង់តាំងបង្ហាញផលិតផល និងសេវាកម្មជាច្រើនប្រភេទ រួមមាន៖ ផលិតផលសក្តានុពល ផលិតផលសម្គាល់ភូមិសាស្ត្រទំនិញ ផលិតផលឧស្សាហកម្ម សេវាកម្ម ធនាគារ និងវិនិយោគ។ ជាមួយគ្នានេះ ក្នុងពិព័រណ៍ខាងលើនេះ នឹងមានកម្មវិធីសំខាន់ៗ ដូចជាវេទិកាពាណិជ្ជកម្មឌីជីថល វេទិកាធុរកិច្ច និងវិនិយោគកម្ពុជា-កូរ៉េ ជំនួបពាណិជ្ជកម្ម សិក្ខាសាលាស្តីពីការជំរុញការនាំចេញ និងការប្រគំតន្ត្រី។

ចំពោះភ្ញៀវជាតិ-អន្តរជាតិ ពាណិជ្ជករ ផលិតករ វិនិយោគិន និងសាធារណជន ដែលចង់ពង្រឹង និងពង្រីកសកម្មភាពពាណិជ្ជកម្ម និងវិនិយោគ តាមរយៈពិព័រណ៍ពាណិជ្ជកម្មកម្ពុជា អាចបំពេញបែបបទស្នើសុំចូលរួម ឱ្យបានមុនថ្ងៃទី២០ ខែវិច្ឆិកា ឆ្នាំ២០២៤។ ចំពោះព័ត៌មានលម្អិត អាចទាក់ទងតាមទូរសព្ទលេខ +៨៥៥ ១៦ ៤១៦ ៨២៥/ +៨៥៥ ៦៩ ៩៤៣ ៨៥៧ ឬអ៊ីម៉ែល[email protected]៕