ភ្នំពេញ៖ ផ្សារមូលបត្រកម្ពុជា ទទួលបានការបើកគណនីថ្មីពីសាធារណជនជាង ២០០០គណនី ក្នុងរយៈពេល ៣ថ្ងៃ នៅក្នុងពិព័រណ៍ផ្សារភាគហ៊ុនកម្ពុជា «My First STOCK» ឆ្នាំ២០២៤ ជាលើកទី៧។ តាមរយៈសេចក្តីប្រកាសព័ត៌មានរបស់ផ្សារមូលបត្រកម្ពុជា នាថ្ងៃទី៣០ ខែតុលា ឆ្នាំ២០២៤។

ផ្សារមូលបត្រកម្ពុជា បានឱ្យដឹងថា ទោះបីជាទំហំសាច់ប្រាក់ហូរចូលផ្សារមូលបត្រក្នុងឆ្នាំ២០២៤ មានទំហំតិចជាងឆ្នាំ២០២៣ ក៏ដោយ តែចំណាប់អារម្មណ៍របស់វិនិយោគិន និងចំនួនវិនិយោគិនថ្មីមានការកើនឡើងច្រើនជាងឆ្នាំ ២០២៣ ដែលក្នុងឆ្នាំ ២០២៤នេះ ផ្សារមូលបត្រកម្ពុជារំពឹងថា គណនីជួញដូរនឹងកើនឡើងជាង ១៥០០០គណនី។

ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃផ្សារមូលបត្រកម្ពុជា មានប្រសាសន៍ថា ការវិនិយោគទៅលើភាគហ៊ុន គឺជាជម្រើសមួយដ៍ល្អប្រសើរសម្រាប់អ្នកដែលទើបចាប់ផ្តើមរៀនវិនិយោគដំបូង ដោយចាប់ផ្តើមពីដើមទុនតិច ប៉ុន្តែទទួលបាននូវអត្ថប្រយោជន៍ច្រើន និងអាចពង្រីកនូវសំណុំវិនិយោគ ដើម្បីបង្កើតចំណូលអកម្មរបស់ខ្លួនបន្ថែមទៀត តាមរយៈទីផ្សារមូលបត្រនេះ។ ជាមួយគ្នានេះ ឯកឧត្តម ហុង សុហួរ បានអំពាវនាវឱ្យសាធារណជន ចូលរួមសាកល្បងវិនិយោគលើភាគហ៊ុនផងដែរ។

ជាមួយគ្នានេះ ឯកឧត្តម ហុង សុហួរ បានលើកឡើងថា ទីផ្សាររបស់កម្ពុជា នឹងវិវឌ្ឍទ្វេរឡើងពីមួយឆ្នាំទៅមួយឆ្នាំប្រកបដោយចីរភាព ដោយសារកំណើនវិនិយោគិនឥតឈប់ឈរ ទំនុកចិត្តមកលើទីផ្សារ ក៏ដូចជាការដឹងពន្លឺភាព និងភាពរីកចម្រើនទៅលើការបង្កើតផលិតផលវិនិយោគផ្សេងៗ និងការបង្កើតយន្តការនានាដើម្បីសម្រាលដល់វិនិយោគិន៕