ភ្នំពេញ៖ សមាគមសហគ្រិនវ័យក្មេងណានចាងរបស់ប្រទេសចិន ស្នើសុំអនុសាសន៍ណែនាំពីរដ្ឋមន្ត្រីក្រសួងទេសចរណ៍ ទៅលើគម្រោងធ្វើធុរកិច្ចរបស់សមាគមដែលបានមកវិនិយោគនៅកម្ពុជា ដើម្បីជំរុញការផ្សព្វផ្សាយសក្តានុពលទេសចរណ៍កម្ពុជាទៅកាន់ខេត្តជាំងស៊ី ប្រទេសចិន។ នេះជាការលើកឡើងរបស់ លោក Xie Deping ប្រធានប្រតិបត្តិសមាគមសហគ្រិនវ័យក្មេងណានចាង។

ក្នុងជំនួបនាថ្ងៃទី២៩ ខែតុលា ឆ្នាំ២០២៤ ជាមួយ លោក Xie Deping នេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក៏បានស្នើឱ្យសមាគមសហគ្រិនវ័យក្មេងណានចាង ជួយផ្សព្វផ្សាយអំពីព័ត៌មានល្អៗរបស់ទេសចរណ៍ និងប្រទេសកម្ពុជា ទៅកាន់សហគមន៍ចិនឱ្យបានទូលំទូលាយផងដែរ។

តាមការចុះផ្សាយរបស់ក្រសួងទេសចរណ៍ នាថ្ងៃទី៣០ តុលា ឯកឧត្តម ហួត ហាក់ បានបន្តលើកឡើងថា ការចុះផ្សាយព័ត៌មានល្អៗពីកម្ពុជានេះ ក៏ជាគោលដៅក្នុងការជំរុញភ្ញៀវទេសចរចិន និងពិភពលោកឱ្យមកលេងប្រទេសកម្ពុជាបានកាន់តែច្រើនឡើងផងដែរ៕