ភ្នំពេញ៖ ឯកឧត្តមហួត ហាក់ រដ្ឋមន្រ្តីក្រសួងទេសចរណ៍ បានឱ្យថ្នាក់ដឹកនាំ និងមន្រ្តីនៅមន្ទីរទេសចរណ៍ខេត្តស្ទឹងត្រែង និងខេត្តមណ្ឌលគិរី ជំរុញការផ្សព្វផ្សាយឱ្យបានទូលំទូលាយ និងត្រូវលើកផ្លាករមណីយដ្ឋានទេសចរណ៍នៅក្នុងខេត្តទាំងពីរ។ ឯកឧត្តម ហួត ហាក់ គូសបញ្ជាក់ថា ការរៀបចំបែបនេះ គឺដើម្បីទាក់ទាញភ្ញៀវទេសចរ ស្របតាមអនុសាសន៍របស់សម្តេចធិបតី ហ៊ុន ម៉ាណែត។

ឯកឧត្តមរដ្ឋមន្រ្តីក្រសួងទេសចរណ៍ បានឱ្យក្រុមខេត្តតំបន់ឦសាន ដែលមានខេត្តស្ទឹងត្រែង និងខេត្តមណ្ឌលគិរីនេះ សហការរៀបចំព្រឹត្តិការណ៍ទេសចរណ៍ប្តូរវេនគ្នាឱ្យមានភាពប្រទាក់ក្រឡា និងរៀបចំកញ្ចប់ទស្សនកិច្ចផងដែរ។ លើសពីនេះ មន្ទីរទេសចរណ៍ ត្រូវយកចិត្តទុកដាក់ពង្រឹងសមត្ថភាពអង្គភាព ពង្រឹងមូលធនមនុស្ស ស្វែងយល់អំពីលិខិតបទដ្ឋានគតិយុត្តក្នុងវិស័យទេសចរណ៍ និងបន្តថែរក្សាបរិយាកាសសុខដុមនីយកម្មនៅក្នុងអង្គភាព។

គួរបញ្ជាក់ថា ឯកឧត្តម ហួត ហាក់ បានជួបសំណេះសំណាលជាមួយថ្នាក់ដឹកនាំ និងមន្រ្តីនៅមន្ទីរទេសចរណ៍ខេត្តស្ទឹងត្រែង កាលពីថ្ងៃទី២៣ ខែតុលា ឆ្នាំ២០២៤ និងខេត្តមណ្ឌលគិរី ថ្ងៃទី២៤ តុលា ពីរបាយការណ៍សង្ខេបវឌ្ឍនភាពការងារ និងបានណែនាំអំពីរបៀបរបបការងារ និងការបំពេញភារកិច្ចដោយឈរលើស្មារតីសាមគ្គីភាព ឯកភាពផ្ទៃក្នុង និងកិច្ចសហប្រតិបត្តិការល្អ។ នេះបើតាមការចុះផ្សាយរបស់ក្រសួងទេសចរណ៍៕