ភ្នំពេញ៖ ស្ពានហាលខាងលិចប្រាសាទអង្គរវត្ត នាខេត្តសៀមរាប បានដាក់សម្ភោធជាផ្លូវការ នៅព្រឹកថ្ងៃទី០៤ ខែវិច្ឆកា ឆ្នាំ២០២៣ ក្រោមព្រះរាជវត្តមានដ៏ខ្ពស់ខ្ពស់ ព្រះមហាក្សត្រ នរោត្តម សីហមុនី នៃព្រះរាជាណាចក្រកម្ពុជា។ នាវរោកាស ព្រះបាទ នរោត្តម សីហមុនី បានមានព្រះរាជសុន្ទរកថា គាំទ្រឱ្យបន្តការអភិវឌ្ឍន៍ធនធានមនុស្សក្នុងវិស័យអភិរក្ស និងស្រាវជ្រាវរបស់កម្ពុជា គ្រប់ទម្រង់ គ្រប់រូបភាព ជាមួយស្ថាប័នប្រទេសជប៉ុន និងដៃគូជាតិ អន្ដរជាតិ ស្របតាមចក្ខុវិស័យនៃយុទ្ធសាស្រ្ដបញ្ចកោណរបស់រាជរដ្ឋាភិបាល។

ទន្ទឹមនឹងនេះ ព្រះករុណាក៏បានកោតសសើរ និងអរគុណដល់វិទ្យាល័យសូហ្វីយ៉ាប្រទេសជប៉ុន ដែលប្រឹងប្រែង និងមានកិច្ចសហប្រតិបត្តិការល្អប្រសើរដោយបានធ្វើការស្រាវជ្រាវ និងជួសជុលស្ពានហាលខាងលិចប្រាសាទអង្គរវត្តឱ្យមានភាពរឹងមាំឡើងវិញ។ សម្រាប់ព្រះអង្គផ្ទាល់ កម្មវិធីនេះ បានបង្ហាញយ៉ាងច្បាស់ពីជោគជ័យជាប្រវត្តិសាស្រ្ដថ្មីមួយទៀត នៃទំនាក់ទំនងការទូតក្នុងរយៈពេល ៧០ឆ្នាំ រវាងកម្ពុជា-ជប៉ុន និងជាព្រឹត្តិការណ៍ប្រវត្តិសាស្រ្ដ ដែលមានតម្លៃជាសកល។

ជាមួយគ្នានេះ ព្រះមហាក្សត្រ បានថ្លែងអំណរគុណ ដល់លោកជំទាវបណ្ឌិតសភាចារ្យ ភឿង សកុណា រដ្ឋមន្រ្ដីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាល នៃអាជ្ញាធរជាតិអប្សរា ដែលបានរាយការណ៍យ៉ាងក្បោះក្បាយអំពីសមិទ្ធផលយ៉ាងសកម្ម អនុវត្តតាមគោលនយោបាយ របស់រាជរដ្ឋាភិបាល។ ក្នុងរបាយការណ៍ ក៏បានបញ្ជាក់អំពីសកម្មភាពរបស់អាជ្ញាធរជាតិអប្សរា ដែលបានរួមចំណែកក្នុងការជួសជុល ថែរក្សាស្ពានហាលខាងលិច នៃប្រាសាទអង្គរវត្ត។

គួរបញ្ជាក់ថា «ស្ពានហាលខាងលិចប្រាសាទអង្គរវត្ត» បានចាប់ផ្ដើមជួសជុលឡើងវិញកាលអំឡុងឆ្នាំ២០១៦ ក្រោមកិច្ចសហការរវាងអាជ្ញាធរជាតិអប្សរា និងសកលវិទ្យាល័យសូហ្វីយ៉ា នៃប្រទេសជប៉ុន៕