ភ្នំពេញ៖ នាយកដ្ឋានការពារសុវត្ថិភាពបច្ចេកវិទ្យាឌីជីថល នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានអំពាវនាវឱ្យប្រជាពលរដ្ឋប្រុងប្រយ័ត្នចំពោះការទិញ-លក់មាសតាមប្រព័ន្ធអនឡាញ ដែលគ្មានប្រភពច្បាស់លាស់ អាចជាមាសក្លែងក្លាយ និងគ្មានលិខិតអនុញ្ញាតពីអាជ្ញាធរត្រឹមត្រូវ។ ការជំរុញឱ្យពលរដ្ឋបង្កើនការប្រុងប្រយ័ត្នលើករណីនេះ ដោយសារបច្ចុប្បន្ន មានក្រុមជនខិលខូចមួយចំនួនប្រើវិធីសាស្ត្រផលិតមាសក្លែងក្លាយ ដើម្បីបន្លំជនរងគ្រោះ។

អគ្គនាយកដ្ឋានបច្ចេកវិទ្យាឌីជីថល បានឱ្យដឹងពីល្បិចឆបោកដែលឧក្រិដ្ឋជនប្រើប្រាស់ ដើម្បីបន្លំជនរងគ្រោះយ៉ាងដូច្នេះថា៖ «ពួកគេប្រើវិធីសាស្ត្រផលិតមាសក្លែងក្លាយ ដោយការប្រើប្រាស់វត្ថុធាតុម្យ៉ាងជ្រលក់ជាមួយទឹកមាស បូករួមជាមួយបច្ចេកទេស ការកាត់តវីដេអូ និងវិធីសាស្ត្រធ្វើតេស្តមាសតាមបែបប្រពៃណី ឱ្យជនរងគ្រោះជឿទុកចិត្ត។ ជាមួយគ្នានេះ ការទិញមាសលើប្រព័ន្ធផ្សព្វផ្សាយអនឡាញ នឹងធ្វើឱ្យអ្នកទិញពិបាកផ្ទៀងផ្ទាត់ផលិតផល តម្លៃ និងសេវាផ្សេងៗ»។

អគ្គនាយកដ្ឋានបច្ចេកវិទ្យាឌីជីថល ក៏បានជំរុញឱ្យពលរដ្ឋជ្រើសរើសហាងលក់គ្រឿងអលង្កាមានអាជ្ញាប័ណ្ណ និងទទួលស្គាល់ដោយអាជ្ញាធរច្បាស់លាស់, មានប្រើប្រាស់ឧបករណ៍លក្ខណៈស្តង់ដារបច្ចេកទេស ពិនិត្យមាសឱ្យបានត្រឹមត្រូវ និងប្រសិនបើសង្កេតឃើញ ឬសង្ស័យមានការលក់មាសក្លែងក្លាយ ប្រជាពលរដ្ឋអាចរាយការណ៍មកកាន់អាជ្ញាធរសមត្ថកិច្ចជំនាញ៕