ភ្នំពេញ៖ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ស្នើឱ្យក្រុមហ៊ុនសាជីវកម្មស្ពាន និងផ្លូវចិន (CRBC) គិតគូរលើការប្រមូលផ្តុំប្រតិបត្តិករឯកជនតូចៗ ដើម្បីទទួលបានសេដ្ឋកិច្ចមាត្រដ្ឋាន(Economies of Scale) ឬការវិនិយោគលើហេដ្ឋារចនាសម្ព័ន្ធប្រព្រឹត្តិកម្មទឹកស្អាត ដើម្បីផលិតទឹកដុំលក់ជូនរដ្ឋាករទឹកក្នុងតម្លៃប្រកួតប្រជែង។

ក្នុងជំនួប នាថ្ងៃទី០៤ ខែកញ្ញា ឆ្នាំ២០២៤ ជាមួយលោក Yang Jie គណៈប្រតិភូរបស់ក្រុមហ៊ុន CRBC ឯកឧត្តម ហែម វណ្ណឌី ក៏បានលើកទឹកចិត្តឱ្យក្រុមហ៊ុន CRBC ចូលរួមដេញថ្លៃគម្រោងសាងសង់រោងចក្រផលិតទឹកស្អាតនានា។ ការលើកទឹកចិត្តនេះ ដោយសារក្រុមហ៊ុន CRBC បានរួមចំណែកកសាងហេដ្ឋារចនាសម្ព័ន្ធរបស់កម្ពុជាជាច្រើន ជាពិសេសគម្រោងធំៗដូចជា៖ ផ្លូវល្បឿនលឿនភ្នំពេញ-ព្រះសីហនុ និងភ្នំពេញ-បាវិតជាដើម។

លោក Yang Jie បានលើកឡើងថា ក្រុមហ៊ុន CRBC គឺមានប្រតិបត្តិការនៅទូទាំងពិភពលោក ដែលមានសាខាក្រៅប្រទេសចំនួន៦៦ និងគម្រោងកំពុងដំណើរការចំនួន៣៩១ ក្នុងទំហំទឹកប្រាក់កិច្ចសន្យាប្រមាណ ១៩,២ ពាន់លានដុល្លារក្នុងឆ្នាំ២០២៣។ លោក Yang Jie បានបង្ហាញពី ជំនាញក្នុងការសាងសង់ហេដ្ឋារចនាសម្ព័ន្ធទឹកស្អាត ដោយរំលេចនូវគម្រោងជោគជ័យនៅក្នុងតំបន់ទីក្រុងនៃប្រទេសមួយចំនួនផងដែរ។

រដ្ឋមន្រ្តីក្រសួងឧស្សាហកម្ម បានបញ្ជាក់បន្ថែមថា វិស័យទឹកស្អាតនៅកម្ពុជា បច្ចុប្បន្នមានរដ្ឋាករទឹកចំនួន១១ និងប្រតិបត្តិករទឹកស្អាតឯកជនជាង៤០០ក្រុមហ៊ុននៅទូទាំងប្រទេស ខណៈដែលរាជរដ្ឋាភិបាលកម្ពុជា ក៏កំពុងកែលម្អវិស័យអាទិភាពនេះ ដើម្បីលើកកម្ពស់តួនាទីយុទ្ធសាស្ត្ររបស់រដ្ឋ និងពង្រឹងការចូលរួមពីវិស័យឯកជនទៀតផង៕