ភ្នំពេញ៖ កម្ពុជា-ហុងគ្រី នឹងបន្តពង្រឹង និងពង្រីកកិច្ចសហប្រតិបត្តិការឱ្យកាន់តែរឹងមាំថែមទៀត ពិសេសនឹងបង្កើនទំហំពាណិជ្ជកម្ម ធុរកិច្ច និងឱកាសវិនិយោគរបស់វិនិយោគិនហុងគ្រីនៅកម្ពុជាឱ្យកាន់តែច្រើន។ នេះជាការលើកឡើងរបស់ឯកឧត្តម Tibor BALOGHDI ឯកអគ្គរដ្ឋទូតនៃប្រទេសហុងគ្រី ប្រចាំកម្ពុជា។

ក្នុងជំនួបជាមួយឯកឧត្តម Tibor BALOGHDI នាថ្ងៃទី២៣ ខែតុលា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា កិច្ចសហប្រតិបត្តិការល្អរវាងក្រសួងការបរទេសនៃភាគីពីរ គឺតាមរយ:ការផ្លាស់ប្តូរទស្សនកិច្ចជាន់ខ្ពស់ និងយន្តការពិគ្រោះយោបល់ទ្វេភាគី ដែលជាយន្តការមួយជួយពង្រឹងនិងពង្រីកនូវទំនាក់ទំនង និងកិច្ចសហប្រតិបត្តិការភាគីពីរឱ្យកាន់តែល្អប្រសើរថែមទៀត។

ក្នុងជំនួបនោះ ប្រទេសទាំងពីរ ក៏បានពិភាក្សាអំពីការបន្តជំរុញកិច្ចសហប្រតិបត្តិការលើវិស័យអាទិភាពមួយចំនួន ជាអាទិ៍៖ ពាណិជ្ជកម្មនិងវិនិយោគ សុខាភិបាល អប់រំ ទេសចរណ៍ វប្បធម៌ និងវិស័យធនធានទឹក និងធារាស្ត្រ ផងដែរ៕