ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នឹងចូលរួម «វេទិកាទេសចរណ៍អាស៊ាន ឆ្នាំ២០២៥» ក្រោមប្រធានបទ «រួបរួមជាចលនា៖ សម្រួចអនាគត នៃវិស័យទេសចរណ៍អាស៊ាន (Unity in Motion - Shaping ASEAN's Tourism Tomorrow)» ចាប់ពីថ្ងៃទី១៧-២១ ខែមករា ឆ្នាំ២០២៥។

ក្នុងវេទិកាខាងលើនេះ កម្ពុជានឹងទទួលជ័យលាភីរង្វាន់ទេសចរណ៍អាស៊ានចំនួន ៤ប្រភេទ អាស៊ានចំនួន៥រង្វាន់ សហគមន៍ទេសចរណ៍អាស៊ានចំនួន៥ រង្វាន់ បង្គន់សាធារណៈចំនួន៥រង្វាន់ និងសេវាកម្មស្ប៉ាអាស៊ានចំនួន៥។ ក្រៅពីវេទិកាទេសចរណ៍អាស៊ាន ដែលនឹងមានការចូលរួមពីរដ្ឋមន្ត្រីទេសចរណ៍មកពីប្រទេសសមាជិកអាស៊ាន ចិន ជប៉ុន កូរ៉េ ឥណ្ឌា រុស្ស៊ី និងស្ថាប័នដៃគូ ឯកឧត្តម ហួត ហាក់ ក៏នឹងចូលរួមកិច្ចប្រជុំថ្នាក់រដ្ឋមន្ត្រីទេសចរណ៍អាស៊ាន លើកទី២៨, កិច្ចប្រជុំរដ្ឋមន្ត្រីទេសចរណ៍អាស៊ានបូក៣ (ចិន ជប៉ុន និងកូរ៉េ) លើកទី២៤ កិច្ចប្រជុំរដ្ឋមន្ត្រីទេសចរណ៍អាស៊ាន-ឥណ្ឌា លើកទី១២ និងកិច្ចប្រជុំរដ្ឋមន្ត្រីទេសចរណ៍អាស៊ាន-រុស្សី លើកទី៤ ផងដែរ។

ក្នុងកិច្ចប្រជុំខាងលើនេះ អង្គប្រជុំនឹងពិនិត្យវឌ្ឍនភាពការងារ ដាក់ចេញនូវទិសដៅការងារ និងអនុម័តលើឯកសារសំខាន់ៗមួយចំនួន ដើម្បីសម្រេចបាននូវចក្ខុវិស័យទេសចរណ៍អាស៊ាន៖ «ត្រឹមឆ្នាំ២០២៥ អាស៊ាននឹងក្លាយជាគោលដៅទេសចរណ៍ល្អឯក ប្រកបដោយ គុណភាព ពិពិធភាព បទពិសោធ ចីរភាព បរិយាបន្ន និងការអភិវឌ្ឍប្រកបដោយការទទួលខុសត្រូវ រួមចំណែកលើកស្ទួយសេដ្ឋកិច្ច សុខុមាលភាពសង្គម ប្រជាជាតិអាស៊ាន»។

ក្នុងឱកាសចូលរួមព្រឹត្តិការណ៍ខាងលើ ឯកឧត្តមរដ្ឋមន្ត្រីក្រសួងទេសចរណ៍ នឹងជួបប្រជុំទ្វេភាគីជាមួយរដ្ឋមន្ត្រី និងថ្នាក់ដឹកនាំទេសចរណ៍នៃប្រទេសសមាជិកអាស៊ាន និងប្រធានស្ថាប័នដៃគូអាស៊ានមួយចំនួន ដើម្បីពង្រឹងកិច្ចសហប្រតិបត្តិការ និងជំរុញលំហូរភ្ញៀវទេសចរមកកាន់កម្ពុជាបន្ថែមទៀត៕