ភ្នំពេញ៖ ផ្សោតពណ៌ផ្កាឈូក ដែលបានកើនឡើងដល់ ៧០ក្បាល បាននិងកំពុងទាក់ទាញភ្ញៀវទេសចរយ៉ាងច្រើនឱ្យទៅទស្សនា និងកម្សាន្ត ដែលនេះបានធ្វើឱ្យសេដ្ឋកិច្ចប្រជាសហគមន៍នេសាទព្រែកត្នោត នៃខេត្តកំពត មានភាពល្អប្រសើរ។ ក្រៅពីផ្សោតពណ៌ផ្កាឈូក ក្នុងតំបន់សហគមន៍នេសាទព្រែកត្នោត ក៏មានផ្សោតក្បាលត្រឡោក និងសត្វជ្រូកទឹកស្នាក់នៅអចិន្ត្រៃយ៍ចំនួន ១ក្បាលផងដែរ។

លោក អ៊ុក សុវណ្ណារិទ្ធ ប្រធានសហគមន៍នេសាទព្រែកត្នោត លើកឡើងថា ភ្ញៀវទេសចរដែលចង់ទស្សនាសត្វផ្សោតមានចំនួនច្រើន ខណៈទូករបស់សហគមន៍នៅមានកម្រិត ដូច្នេះទាមទារឱ្យភ្ញៀវទេសចរកក់ទូក កញ្ចុះ និងម្ហូបអាហារសម្រាប់ទទួលទាន មុនយ៉ាងហោចណាស់ ២ថ្ងៃ តាមលេខទូរសព្ទ ០៨៩ ២១៩ ៥២៤។ លោក អ៊ុក សុវណ្ណារិទ្ធ បានបញ្ជាក់ថា សមិទ្ធផលទាំងនេះ បានមកពីការផ្សព្វផ្សាយទូលំទូលាយរបស់ក្រសួង ស្ថាប័នសារព័ត៌មាន និងក្រុម Influencers ជាដើម។

ប្រធានសហគមន៍នេសាទព្រែកត្នោតរូបនេះ ក៏បានអរគុណដល់ក្រសួង អាជ្ញាធរ និងស្ថាប័នពាក់ព័ន្ធ ដែលបានជួយបង្ក្រាបបទល្មើសនេសាទ និងអភិរក្សធនធានធម្មជាតិ ធ្វើឱ្យព្រៃកោងកាង ក្លាយជាជម្រកនៃវារីសត្វ ដែលជាចំណីរបស់សត្វផ្សោត ព្រមទាំងការពារ និងពង្រីកស្មៅសមុទ្រជាចំណីរបស់សត្វជ្រូកទឹកផងដែរ។ លទ្ធផលនេះ គឺធានាបាននិរន្ដរភាពនៃធនធានធម្មជាតិ ស្របទៅតាមគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ដែលខិតខំធ្វើឱ្យប្រជាជនកម្ពុជា «មានហូប មានបាន មានប្រើ និងមានរហូត»៕