ភ្នំពេញ៖ ធនាគារជាតិ សហការជាមួយក្រុមហ៊ុន Ant International ដាក់ឱ្យដំណើរការជាផ្លូវការនូវប្រព័ន្ធទូទាត់កូដ QR ឆ្លងដែន ដោយភ្ជាប់ប្រព័ន្ធបាគងកម្ពុជា ជាមួយនឹង Alipay+ ដែលជាដំណោះស្រាយទូទាត់ប្រាក់តាមទូរសព្ទឈានមុខគេលើពិភពលោក។ នេះបើតាមការចុះផ្សាយរបស់ធនាគារជាតិនៃកម្ពុជា កាលពីថ្ងៃទី១៤ ខែតុលា ឆ្នាំ២០២៤។

កិច្ចសហប្រតិបត្តិការខាងលើនេះ អ្នកប្រើប្រាស់បណ្តាញ Alipay+ នឹងអាចស្កេនខេអេចឃ្យូអរកូត (KHQR Code) ដើម្បីទូទាត់ថ្លៃទំនិញ និងសេវារបស់អាជីវករនៅប្រទេសកម្ពុជា ដែលមានគណនីជាប្រាក់រៀលបានផងដែរ។ លោកស្រី ជា សិរី ទេសាភិបាលធនាគារជាតិ បានបញ្ជាក់ថា កិច្ចសហការនាពេលនេះ នឹងពង្រីក ព្រមទាំងបង្កើនប្រព័ន្ធទូទាត់ឌីជីថលរបស់កម្ពុជា និងផ្តល់បទពិសោធប្រកបដោយភាពរលូនសម្រាប់ទាំងប្រជាជនក្នុងស្រុក និងភ្ញៀវអន្តរជាតិ។

ក្នុងកម្មវិធីសម្ពោធដាក់ឱ្យដំណើរការគម្រោងទូទាត់ឆ្លងដែនតាមឃ្យូអរកូត (KHQR) ក្នុងភាពជាដៃគូជាមួយក្រុមហ៊ុន Ant International នេះ បានធ្វើឡើង កាលពីថ្ងៃទី១៤ ខែតុលា ដោយមានវត្តមាន លោក Edward Yue អ្នកគ្រប់គ្រងទូទៅទទួលបន្ទុកតំបន់អាស៊ីអាគ្នេយ៍ អូស្ត្រាលី និងនូវែលសេឡង់ នៃក្រុមហ៊ុន Ant International, លោកជំទាវបណ្ឌិត ជា សិរី និងតំណាងគ្រឹះស្ថានធនាគារនិងហិរញ្ញវត្ថុ៕