ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) នឹងមានបេសកកម្មទៅចក្រភពអង់គ្លេស និងសហភាពអឺរ៉ុបនាពេលឆាប់ៗខាងមុខ ដើម្បីទាក់ទាញ និងជំរុញវិនិយោគិនចក្រភពអង់គ្លេស និងសហភាពអឺរ៉ុបមកវិនិយោគនៅកម្ពុជា។ នេះបើយោងតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី១៨ ខែតុលា ឆ្នាំ២០២៤។

ក្នុងជំនួបរវាង ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក Matt Jackson នាយក និងជាប្រធានផ្នែកធុរកិច្ចចក្រភពអង់គ្លេស-អាស៊ាន នៃក្រុមហ៊ុន KPMG កាលពីថ្ងៃទី១៨ ខែតុលា ឆ្នាំ២០២៤ ភាគីទាំងពីរ ក៏បានពិភាក្សាពីយុទ្ធសាស្ត្រផ្សព្វផ្សាយសក្ដានុពល និងឱកាសវិនិយោគនៅកម្ពុជា ដល់វិនិយោគិនចក្រភពអង់គ្លេស និងសហភាពអឺរ៉ុបផងដែរ។

CDC បាននិងកំពុងរៀបចំបេសកកម្មគោះទ្វារវិនិយោគជាបន្តបន្ទាប់ទៅកាន់ប្រទេសផ្សេងៗជាច្រើនបន្ថែមទៀត ដើម្បីផ្សព្វផ្សាយឱ្យបានកាន់តែទូលំទូលាយអំពីសក្ដានុពល និងកាលានុវត្តភាពវិនិយោគរបស់កម្ពុជា។ ឯកឧត្តម ស៊ុន ចាន់ថុល បានលើកឡើងថា កម្ពុជា បាននិងកំពុងឈានទៅរកភាពរីកចម្រើនថ្មីៗ ខណៈដែលរាជរដ្ឋាភិបាលក្នុងនីតិកាលទី៧ ត្រៀមខ្លួនទទួលរាល់វិនិយោគិនពីគ្រប់បណ្តាប្រទេស មានជាអាទិ៍ ចក្រភពអង់គ្លេស និងសហភាពអឺរ៉ុបជាដើម៕