ភ្នំពេញ៖ ធនាគារជាតិនៃកម្ពុជា បានលើកឡើងថា គណនីតេលេក្រាម មានឈ្មោះ «ធនាគារជាតិនៃកម្ពុជា វិនិយោគ» គឺជាគណនីឆបោកប្រាក់កាសរបស់ប្រជាពលរដ្ឋ តាមរយៈការផ្សព្វផ្សាយពីគម្រោងវិនិយោគ ឬប្រតិបត្តិការជួញដូរផលិតផលហិរញ្ញវត្ថុក្រៅផ្លូវការ ដូចជាហាងឆេងមាស អត្រាប្តូរប្រាក់ ឬទ្រព្យឌីជីថល ជាដើម។

ពាក់ព័ន្ធនឹងករណីខាងលើនេះ ធនាគារជាតិ បដិសេធទាំងស្រុងថា ធនាគារជាតិ មិនមានក្រុមឆាណែល ឬគណនីតេលេក្រាមផ្លូវការទេ ហើយក៏មិនធ្លាប់ប្រើប្រាស់បណ្តាញទំនាក់ទំនងសង្គមផ្សេងៗទៀត សម្រាប់ផ្សព្វផ្សាយឱ្យសាធារណជនចូលរួមវិនិយោគលើទីផ្សារហិរញ្ញវត្ថុឡើយ។ នេះបើតាមការចុះផ្សាយរបស់ធនាគារជាតិ កាលពីថ្ងៃទី១៤ ខែតុលា ឆ្នាំ២០២៤។

ធនាគារជាតិ ក៏បានអំពាវនាវដល់សាធារណជនឱ្យបង្កើនការប្រុងប្រយ័ត្នខ្ពស់ជាប់ជាប្រចាំ ដើម្បីកុំឱ្យចាញ់បោកល្បិចកលជនទុច្ចរិតមួយចំនួន ដែលអាចនាំឱ្យបាត់បង់ប្រាក់កាស ឬទ្រព្យសម្បត្តិផ្សេងៗ។ ធនាគារជាតិ ជំរុញឱ្យពលរដ្ឋរាយការណ៍គណនីឆបោកដែលបានជួបប្រទះទៅកាន់ក្រុមហ៊ុនតេលេក្រាម ដោយចុចលើ Report Scam ដើម្បីក្រុមហ៊ុនអាចលុប ឬបង្កកគណនីនេះ៕