ភ្នំពេញ៖ ធនាគារជាតិនៃកម្ពុជា មិនមានក្រុមឆាណែល ឬគណនី Telegram ឬបណ្តាញទំនាក់ទំនងសង្គមផ្សេងៗ ដែលផ្សព្វផ្សាយឱ្យសាធារណជនចូលរួមវិនិយោគលើទីផ្សារហិរញ្ញវត្ថុ ដូចជាហាងឆេងមាស អត្រាប្តូរប្រាក់ ឬទ្រព្យឌីជីថលឡើយ។ នេះបើតាមការចុះផ្សាយរបស់ធនាគារជាតិ នាថ្ងៃទី៣ ខែកញ្ញា ឆ្នាំ២០២៤។

ធនាគារជាតិនៃកម្ពុជា បានបញ្ជាក់ថា បច្ចុប្បន្ន មានគណនីបណ្តាញសង្គមមួយចំនួន បានប្រើប្រាស់និមិ្មត្តសញ្ញា និងឈ្មោះធនាគារជាតិ ដោយមិនមានការអនុញ្ញាតក្នុងចេតនាទុច្ចរិតបង្កើតរូបភាពបំភាន់ភ្នែក ដើម្បីផ្សព្វផ្សាយពីគម្រោងវិនិយោគ ឬប្រតិបត្តិការជួញដូរផលិតផលហិរញ្ញវត្ថុក្រៅផ្លូវការ។

ធនាគារជាតិ អំពាវនាវឱ្យសាធារណជនបង្កើនការប្រុងប្រយ័ត្ន ដើម្បីកុំឱ្យធ្លាក់ចូលល្បិចឆបោកដែលនាំឱ្យបាត់បង់ប្រាក់កាស ឬទ្រព្យសម្បត្តិដោយការចូលរួមវិនិយោគជាមួយក្រុមគ្មានអាជ្ញាប័ណ្ណ និងត្រួតពិនិត្យពីអាជ្ញាធរមានសមត្ថិកិច្ច។ ពាក់ព័ន្ធនឹងករណីនេះ ធនាគារជាតិបានបដិសេធទាំងស្រុងចំពោះបណ្តាញសង្គមដែលផ្សព្វផ្សាយពីការវិនិយោគខុសច្បាប់ទាំងឡាយ ដោយប្រើប្រាស់និម្មិតសញ្ញា និងឈ្មោះធនាគារជាតិទាំងឆាណែល ឬគណនី Telegram៕