ភ្នំពេញ៖ កម្ពុជា-កៀហ្ស៊ីស៊ីស្ថាន ចុះអនុស្សរណៈយោគយល់គ្នា(MOU) ស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសនៃប្រទេសទាំងពីរ និងបានឯកភាពគ្នារៀបចំកិច្ចប្រជុំទ្វេភាគីឱ្យបានឆាប់។ កិច្ចសហប្រតិបត្តិការនេះ ត្រូវបានព្រមព្រៀង និងចុះហត្ថលេខាដោយ ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងឯកឧត្តម ហ្សិនប៊ែក គូឡូបេវ រដ្ឋមន្ត្រីក្រសួងការបរទេសកៀហ្ស៊ីស៊ីស្ថាន។

ជំនួបទ្វេភាគីរវាងទ្វេភាគី កាលពីថ្ងៃទី២៣ ខែកញ្ញា ឆ្នាំ២០២៤ នៅទីស្នាក់ការអង្គការសហប្រជាជាតិ ទីក្រុងញូវយ៉ក រដ្ឋមន្ត្រីទាំងពីរបានពិភាក្សាអំពីការលើកកម្ពស់ទំនាក់ទំនងក្នុងក្របខ័ណ្ឌទ្វេភាគី និងពហុភាគី ពិសេសក្នុងវិស័យពាណិជ្ជកម្ម វិនិយោគ និងការផ្លាស់ប្តូររវាងប្រជាជននិងប្រជាជន។ នាឱកាសនោះដែរ ឯកឧត្តម ហ្សិនប៊ែក គូឡូបេវ បានស្វាគមន៍និស្សិតកម្ពុជាដែលមានបំណងសិក្សាផ្នែកសុខាភិបាលនៅកៀហ្ស៊ីស៊ីស្ថានផងដែរ។ នេះបើតាមការចុះផ្សាយរបស់ក្រសួងការបរទេស កាលពីថ្ងៃទី២៤ ខែកញ្ញា ឆ្នាំ២០២៤៕