ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានជំរុញឱ្យក្រុមហ៊ុន Levi Strauss & Co ដែលជាក្រុមហ៊ុនសម្លៀកបំពាក់លំដាប់ពិភពលោករបស់អាម៉េរិក និងមានម៉ាកសញ្ញា Levi's ពិនិត្យលទ្ធភាពបណ្ដាក់ទុនវិនិយោគ និងពង្រីកវិសាលភាពផលិតកម្មនៅកម្ពុជា។

ឯកឧត្តម ស៊ុន ចាន់ថុល បានប្រាប់តំណាងក្រុមហ៊ុន Levi Strauss & Co ពីកិច្ចសម្របសម្រួលលើការងារវិនិយោគពីសំណាក់ក្រុមប្រឹក្សាអភិវឌ្ឍន៍កម្ពុជា និងភាគីពាក់ព័ន្ធ ដែលអាចធានាបាននូវបរិយាកាសវិនិយោគប្រកបដោយភាពអនុគ្រោះបំផុត។ នាឱកាសនោះដែរ តំណាងក្រុមហ៊ុន Levi Strauss & Co បានលើកឡើងពីសាវតាររបស់ក្រុមហ៊ុន និងតម្រូវការនានា ដែលជាមូលដ្ឋានដល់ការសម្រេចចិត្ត ដើម្បីពង្រីកអាជីវកម្ម ដូចជាការប្រើប្រាស់ថាមពលស្អាត សំដៅធានាដល់ការអភិវឌ្ឍប្រកបដោយចីរភាព។

ក្នុងកិច្ចពិភាក្សា កាលពីថ្ងៃទី២៣ ខែកញ្ញា ឆ្នាំ២០២៤ ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានបង្ហាញពីបច្ចុប្បន្នភាពការផលិត និងផ្គត់ផ្គង់ថាមពលនៅប្រទេសកម្ពុជា ដែលក្នុងនោះ ៦២%នៃថាមពលសរុប បានប្រើប្រាស់សម្រាប់ការផ្គត់ផ្គង់ គឺជាប្រភេទថាមពលស្អាត និងកកើតឡើងវិញ។ នេះបើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា៕