ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានចុះទស្សនកិច្ចឈ្វេងយល់អំពីទំនើបកម្មបច្ចេកវិទ្យាឈានមុខ នៅទីស្នាក់ការកណ្តាលក្រុមហ៊ុន SpaceX របស់មហាសេដ្ឋីអាម៉េរិក លោក Elon Musk កាលពីថ្ងៃទី២៤ ខែកញ្ញា ឆ្នាំ២០២៤នេះ។ ក្នុងដំណើរទស្សនកិច្ចនេះតបតាមការអញ្ជើញរបស់ក្រុមហ៊ុន SpaceX ផ្ទាល់តែម្តង។

ក្នុងដំណើរទស្សនកិច្ចនេះ ឯកឧត្តម ស៊ុន ចាន់ថុល និងប្រតិភូរាជរដ្ឋាភិបាលកម្ពុជា បានសិក្សាស្វែងយល់បន្ថែមអំពីទំនើបកម្មបច្ចេកវិទ្យាទំនើបថ្មីៗ ប្រព័ន្ធប្រតិបត្តិការផ្កាយរណប ក៏ដូចជារបៀបរបបនៃការបង្កើនប្រសិទ្ធភាពការងារ តាមរយៈការប្រើប្រាស់បច្ចេកវិទ្យាថ្មីៗជាច្រើនរបស់ក្រុមហ៊ុន ជាពិសេស ប្រតិបត្តិការក្រុមផ្កាយរណប Starlink ជាដើម។

គួរជម្រាបដែរថា Starlink គឺជាក្រុមផ្កាយរណបអ៊ីនធឺណិត ដែលផ្គត់ផ្គង់សេវាអ៊ីនធឺណិតល្បឿនលឿនចល័តជាសកល គ្របដណ្តប់ជាង ១០០ប្រទេសនៅលើពិភពលោក។ ប្រតិបត្តិការនេះ ដំណើរការដោយ Starlink Services, LLC ជាក្រុមហ៊ុនបុត្រសម្ព័ន្ធរបស់ក្រុមហ៊ុន SpaceX ៕