ភ្នំពេញ៖ ក្រសួងប្រៃសណីយ៍ និងទូរគមនាគមន៍ លើកទឹកចិត្តសិស្សានុសិស្សឱ្យចាប់យកសិក្សាជំនាញឌីជីថល ក្រោយទទួលបានជោគជ័យក្នុងការប្រឡងសញ្ញាបត្រមធ្យមសិក្សាទុតិយភូមិ។ តាមការចុះផ្សាយរបស់ក្រសួងប្រៃសណីយ៍ នាថ្ងៃទី១៨ ខែកញ្ញា ឆ្នាំ២០២៤ ការចាប់យកជំនាញឌីជីថលនេះ សិក្សានុសិស្សនឹងទទួលបានការងារល្អ និងចំណូលខ្ពស់ដែលអាចជួយលើកកម្ពស់ជីវភាពផ្ទាល់ខ្លួន និងគ្រួសារ។

ក្រសួងប្រៃសណីយ៍ បានឱ្យដឹងថា បច្ចេកវិទ្យាឌីជីថល (Digital Technology) គឺជាបច្ចេកវិទ្យាឈានមុខថ្មីៗ (Emerging Technology) ដែលបានដើរតួនាទីយ៉ាងសំខាន់ក្នុងជីវភាពរស់នៅ ការធ្វើអាជីវកម្ម និងការផ្ដល់សេវាសាធារណៈ ប្រកបដោយប្រសិទ្ធភាពខ្ពស់។ ជាមួយគ្នានេះ ការចាប់យកជំនាញឌីជីថល (Digital Skills) ដែលស្របតាមបរិបទនៃបដិវត្តន៍ឧស្សាហកម្ម៤.០ នឹងរួមចំណែកលើកស្ទួយ និងអភិវឌ្ឍន៍ប្រទេសជាតិ ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។

នៅក្នុងផែនទីបង្ហាញផ្លូវអភិវឌ្ឍន៍ជំនាញឌីជីថល២០២៤-២០៣៥ របស់រាជរដ្ឋាភិបាល ដែលអនុម័តកាលពីដើមឆ្នាំ២០២៤ បានដាក់ចេញនូវក្របខ័ណ្ឌសមត្ថភាពជំនាញឌីជីថល ដោយបែងចែកជា ៧ផ្នែក ២០ក្រុមជំនាញ និង ៦៣មុខរបរ ដែលកំពុងមានតម្រូវការខ្ពស់ និងងាយទទួលបានឱកាសការងារ។

មុខរបរ ដែលកំពុងមានតម្រូវការនោះ រួមមាន៖ ផ្នែកហេដ្ឋារចនាសម្ព័ន្ធឌីជីថល (Digital Infrastructure), ផ្នែកសន្តិសុខសាយប័រ (Cybersecurity), ផ្នែកអភិបាលកិច្ចទិន្នន័យ (Data Governance), ផ្នែកសុសវែរនិងកម្មវិធីកុំព្យូទ័រ (Software and Applications), ផ្នែកទិន្នន័យនិងបញ្ញាសិប្បនិម្មិត (Data and Artificial Intelligence), ផ្នែកទំនាក់ទំនង លក់ និងទីផ្សារឌីជីថល (Digital Communication, Sales, and Marketing) និងផ្នែកនវានុវត្តន៍ឌីជីថលនិងសហគ្រិនភាព (Digital Innovation and Entrepreneurship)៕