ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជា (អគរ) នឹងផ្អាកដំណើរការជាបណ្តោះអាសន្ននូវប្រព័ន្ធស្វ័យប្រវត្តិកម្មគយទាំងស្រុង នៅថ្ងៃទី២១ ខែកញ្ញា ឆ្នាំ២០២៤ ចាប់ពីម៉ោង ១៨:០០នាទី រហូតដល់ម៉ោង ២០:០០ នាទី។ នេះបើតាមសេចក្តីជូនដំណឹង ស្តីពី ការផ្អាកដំណើរការបណ្តោះអាសន្នប្រព័ន្ធស្វ័យប្រវត្តិកម្មគយ។

តាមការចុះផ្សាយរបស់អគ្គនាយកដ្ឋានគយ នាថ្ងៃទី១៧ កញ្ញា ការផ្អាកដំណើរការបណ្តោះអាសន្នប្រព័ន្ធស្វ័យប្រវត្តិកម្មគយនេះ គឺដើម្បីកែសម្រួល និងដោះស្រាយបញ្ហាបច្ចេកទេសនៅលើប្រព័ន្ធម៉ាស៊ីនមេ ពិសេសដើម្បីបំពេញតម្រូវការចាំបាច់ក្នុងការធានាប្រសិទ្ធភាព និងនិរន្តរភាពប្រព័ន្ធបច្ចេកវិទ្យាព័ត៌មានរបស់អគ្គនាយកដ្ឋានគយ។

អគ្គនាយកដ្ឋានគយ និងរដ្ឋាករកម្ពុជា បានអំពាវនាវឱ្យអ្នកប្រើប្រាស់ និងសាធារណជនទាំងអស់ បញ្ចប់ប្រតិបត្តិការ និងចាកចេញពីប្រព័ន្ធស្វ័យប្រវត្តិកម្មគយឱ្យបានមុនពេលកំណត់ ដើម្បីចៀសវាងការជួបប្រទះបញ្ហាបច្ចេកទេសជាយថាហេតុ៕