ភ្នំពេញ៖ ដំណើរទស្សនកិច្ចទិសឦសានផ្សារភ្ជាប់បូរណភាពទឹកដី និងអធិបតេយ្យភាពជាតិ និងបូរណភាពទឹកដីកម្ពុជា នៅតាមបណ្តាខេត្តក្នុងតំបន់ត្រីកោណអភិវឌ្ឍន៍ (DTA) ដែលមានក្រចេះ និងមណ្ឌលគិរី ស្ទឹងត្រែងនិងរតនគិរី មានចម្ងាយផ្លូវទាំងទៅទាំងមកជាង ៧០០គីឡូម៉ែត្រ លើកទី២ កំពុងមានការចាប់អារម្មណ៍ខ្លាំងពីសំណាក់សាធារណជន។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នាថ្ងៃទី១៤ ខែកញ្ញា ឆ្នាំ២០២៤។

ដំណើរទស្សនកិច្ចទិសឦសានដោយឥតគិតថ្លៃលើកទី២ លើតម្រាយផ្លូវតាមបណ្តោយព្រំដែនក្នុងខេត្តត្បូងឃ្មុំ ក្រចេះ និងមណ្ឌលគិរីនេះ មានការចូលរួមពីសាធារណជន ព្រះសង្ឃ ប្រជាពលរដ្ឋ និស្សិត បញ្ញាវ័ន្តសរុបម្រមាណ ២០០នាក់ កាលពីថ្ងៃទី១៤ ខែកញ្ញា ឆ្នាំ២០២៤។ ដំណើរទស្សនកិច្ចលើកទី២នេះ បានធ្វើឱ្យប្រជាពលរដ្ឋស្គាល់ពីទឹកដី និងខណ្ឌសីមាព្រំដែនគោកកាន់តែច្បាស់លាស់ ពិសេសបានយល់ពីសារសំខាន់នៃការកសាងផ្លូវក្រវាត់ព្រំដែន ក៏ដូចជាការអភិវឌ្ឍជាក់ស្តែងនៅតាមបណ្តាខេត្តនៅភូមិភាគឦសាន។

កម្មវិធីដំណើរកម្សាន្តទៅកាន់ទិសឦសាននេះ មិនតម្រូវឱ្យមានការបង់ប្រាក់ទេ រាល់ការចំណាយលើការធ្វើដំណើរ អាហារ ភេសជ្ជៈ និងការស្នាក់នៅ គឺនឹងផ្តល់ជូនដោយឥតគិតថ្លៃ ដែលទទួលបានការឧបត្ថម្ភពីសម្តេចធិបតី ហ៊ុន ម៉ាណែត និងលោកជំទាវបណ្ឌិត និងការឧបត្ថម្ភពីសប្បុរសជន ដូចជាក្រុមហ៊ុនទឹកបរិសុទ្ធវីតាល ក្រុមហ៊ុនចុងភៅ សេង ហុកហេង និងក្រុមហ៊ុនភេសជ្ជៈបាកាស៕