ភ្នំពេញ៖ រយៈពេល៩ខែនៃឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគ ដែលមានទំហំទុនវិនិយោគជិត ៤ប៊ីលានដុល្លារ ក្នុងនោះទុនវិនិយោគរបស់ចិនមានប្រមាណ ៧៦%។ ការវិនិយោគរបស់ចិននៅក្នុងប្រទេសកម្ពុជា កើនឡើងច្រើនលើវិស័យកម្មន្តសាល។ 

ក្នុងជំនួបពិភាក្សាការងារជាមួយនឹងគណៈប្រតិភូសមាគមសភាពាណិជ្ជកម្មចិន ដឹកនាំដោយលោក Lin Shiqiang ប្រធានសមាគម នៅទីស្តីការក្រុមប្រឹក្សាអភិវឌ្ឍន៍កម្ពុជា ឯកឧត្តម ជា វុទ្ធី បានលើកឡើងអំពី សារសំខាន់ចំពោះកិច្ចសហប្រតិបត្តិការវិនិយោគ និងកិច្ចសហប្រតិបត្តិការផ្សេងៗទៀត រវាងប្រទេសកម្ពុជា-ចិន។ គោលបំណងនៃជួបពិភាក្សាការងារនៅថ្ងៃទី២៤ តុលា ឆ្នាំ២០២៣នេះ ដើម្បីស្តាប់មតិយោបល់ពីសមាគមសភាពាណិជ្ជកម្មចិន ក្នុងការចូលរួមកែលម្អបរិស្ថានវិនិយោគនៅកម្ពុជា ដែលក្រុមប្រឹក្សាអភិវឌ្ឍន៍កម្ពុជា យកចិត្តទុកដាក់ខ្ពស់ចំពោះវិនិយោគិនចិន។

ក្នុងជំនួបនោះ លោកប្រធានគណៈប្រតិភូ បានស្នើសុំឱ្យឯកឧត្តមអគ្គលេខាធិការពន្យល់ពីវិស័យអាទិភាពដែលមានចែងក្នុងច្បាប់វិនិយោគថ្មី និងយន្តការដោះស្រាយបញ្ហារបស់វិនិយោគិនចិន។ ឯកឧត្តម ជា វុទ្ធី អគ្គលេខាធិការគណៈកម្មការ វិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានលើកឡើងទាក់ទងនឹងច្បាប់វិនិយោគនេះថា ក្នុងច្បាប់វិនិយោគថ្មី វិស័យអាទិភាពមានចំនួន ១៩ ដែលក្នុងនោះមានវិស័យអាទិភាពពីរ ដែលយើងកំពុងចង់បានខ្លាំងបំផុត។

វិស័យអាទិភាពនោះ គឺការវិនិយោគក្នុងវិស័យដែលមានបច្ចេកវិទ្យាខ្ពស់ ប្រកបដោយនវានុវត្តន៍ និងការស្រាវជ្រាវ និងការអភិវឌ្ឍន៍ និងការវិនិយោគក្នុងវិស័យកសិកម្ម កសិឧស្សាហកម្ម ឧស្សាហកម្មកែច្នៃផលិតផលកសិកម្ម ឧស្សាហកម្មកែច្នៃចំណីអាហារ ដែលបម្រើទីផ្សារក្នុងស្រុក ឬការនាំចេញ៕