ភ្នំពេញ៖ ក្រសួងទេសចរណ៍ និងក្រុមហ៊ុន Visa Worldwide PTE. Limited បានចុះអនុស្សរណៈនៃការយោគយល់គ្នា (MOU) ជំរុញកំណើនទេសចរណ៍នៅកម្ពុជា តាមរយៈកិច្ចសហការដែលផ្តោតលើការចែករំលែកទិន្នន័យ និងការគាំទ្រផ្នែកទីផ្សារ ពិសេសការកសាងសមត្ថភាព និងចំណេះដឹងផ្នែកហិរញ្ញវត្ថុនិងឌីជីថល។

កិច្ចសហការ កាលពីថ្ងៃទី១០ ខែកញ្ញា ឆ្នាំ២០២៤នេះ ត្រូវបានចុះហត្ថលេខាដោយ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ និងលោក Arturo Planell អ្នកគ្រប់គ្រងប្រចាំតំបន់អាស៊ីអាគ្នេយ៍របស់ក្រុមហ៊ុន Visa Worldwide PTE. Limited។ ក្នុងពិធីចុះហត្ថលេខានេះ ភាគីទាំងពីរក៏បានឯកភាពសហការផ្លាស់ប្តូរបរិបទឌីជីថល ដែលផ្ដោតលើការទូទាត់តាមឌីជីថលក្នុងវិស័យទេសចរណ៍ទាំងមូលផងដែរ។

ឯកឧត្តម សុខ សូកេន បានគូសបញ្ជាក់ពីភាពជាដៃគូយ៉ាងសំខាន់ក្នុងកិច្ចសហការ នាពេលនេះយ៉ាងដូច្នេះថា៖ «ក្រុមហ៊ុន Visa Worldwide PTE. Limited នឹងចូលរួមជាមួយក្រសួងទេសចរណ៍កសាងប្រព័ន្ធបច្ចេកវិទ្យាមួយដ៏រឹងមាំ ដើម្បីផ្ដល់ភាពងាយស្រួលក្នុងការប្រើប្រាស់ និងទូទាត់សម្រាប់ទេសចរនៅកម្ពុជា»៕