ភ្នំពេញ៖ ដើម្បីបញ្ចៀសហានិភ័យក្នុងពេលអនុវត្តគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ក្រសួងស្ថាប័នពាក់ព័ន្ធ ត្រូវចូលរួមអភិវឌ្ឍន៍រដ្ឋាភិបាលឌីជីថលប្រកបដោយការទទួលខុសត្រូវ និងត្រូវចាត់តាំងមន្ត្រីដែលមានសមត្ថភាពដឹកនាំនិងគ្រប់គ្រងអនុវត្តការងារ និងមានសិទ្ធិអំណាចក្នុងការរៀបចំនិងបែងចែកធនធាន និងកំណត់អាទិភាពរបស់ក្រសួងស្ថាប័ន។

បន្ថែមពីនេះ ក្រសួង និងស្ថាប័នពាក់ព័ន្ធ ត្រូវបង្កឱ្យមានការសហការជិតស្និទ្ធផ្ទៃក្នុងរបស់ក្រសួងស្ថាប័ននីមួយៗ អន្តរស្ថាប័ន តួអង្គពាក់ព័ន្ធ ដើម្បីចែករំលែកព័ត៌មាន បទពិសោធ និងពង្រឹងតម្លាភាពនិងសុចរិតភាពក្នុងការងារ ដើម្បីធានាបាននូវភាពជឿទុកចិត្តនិងការងាររួមគ្នាបានដោយរលូន និងប្រសិទ្ធភាពខ្ពស់។ នេះបើតាមគោលនយោបាយរដ្ឋាភិបាលឌីជីថលកម្ពុជា២០២២-២០៣៥៕