ភ្នំពេញ៖ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម លើកទឹកចិត្តឱ្យមន្ទីរពាណិជ្ជកម្ម រាជធានី-ខេត្ត ចំនួន១៩ ខិតខំផ្សព្វផ្សាយ និងជំរុញអាជីវករ ឱ្យចូលរួមលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី បន្ថែមទៀត ដើម្បីទទួលបានជោគជ័យក្នុងការអនុវត្តគម្រោងតាមការរំពឹងទុក។ នេះបើតាមការចុះផ្សាយរបស់ ក្រសួងពាណិជ្ជកម្ម កាលពីថ្ងៃទី២៩ ខែមេសា ឆ្នាំ២០២៥។

ក្នុងកិច្ចប្រជុំពិនិត្យវឌ្ឍនភាពការអនុវត្តការដាក់លក់ផលិតផលខ្មែរ តាមបណ្តាស្ថានីយប្រេងឥន្ធនៈភីធីធី ប្រចាំខែមីនា និងមេសា ឆ្នាំ២០២៥ ក្រោមកិច្ចសហការជំរុញ និងបង្កើតការលក់ផលិតផលខ្មែររវាងក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) កាលពីថ្ងៃទី២៨ មេសា តំណាងមន្ទីរពាណិជ្ជកម្មរាជធានី-ខេត្តទាំង១៩ បានរាយការណ៍អំពីបញ្ហាប្រឈម និងបានលើកជាសំណូមពរ ដល់ក្រុមហ៊ុន ភីធីធី ដើម្បីស្វែងរកដំណោះស្រាយ និងសម្របសម្រួលបន្ថែមផងដែរ។

កិច្ចប្រជុំខាងលើនេះ ដែលមានការចូលរួមពីតំណាងអគ្គនាយកដ្ឋានជំរុញពាណិជ្ជកម្ម អគ្គនាយកដ្ឋានពាណិជ្ជកម្មក្នុងប្រទេស នាយកដ្ឋានអភិវឌ្ឍន៍ទីផ្សារ មន្ទីរពាណិជ្ជកម្មរាជធានី-ខេត្តទាំង១៩ និងក្រុមហ៊ុន ភីធីធី (ខេមបូឌា) លោកប្រធាននាយកដ្ឋានអភិវឌ្ឍន៍ទីផ្សារ បានរាយការណ៍អំពីវឌ្ឍនភាពការងារ ក្នុងខែមីនា និងមេសា នៃការអនុវត្តការលក់ផលិតផលខ្មែរនៅតាមបណ្តាស្ថានីយប្រេងឥន្ធនៈភីធីធី ចំនួន ៣០ទីតាំង នៅតាមបណ្តារាជធានី-ខេត្តទាំង១៩ នេះ៕