ភ្នំពេញ៖ កម្ពុជា និងអារ៉ាប៊ីសាអូឌីត បានបង្ហាញការប្តេជ្ញាចិត្តរួមគ្នាក្នុងការពង្រឹង និងពង្រីកទំនាក់ទំនងបន្ថែមទៀត។ ក្នុងជំនួបទ្វេភាគីកាលពីថ្ងៃទី២០ ខែតុលា ឆ្នាំ២០២៣នេះ ប្រមុខថ្នាក់ដឹកនាំនៃប្រទេសទាំងពីរ បានឯកភាពលើទិសដៅបង្កើតយន្តការទ្វេភាគី ដើម្បីពិភាក្សាអំពីកិច្ចសហប្រតិបត្តិការលើវិស័យ ពាណិជ្ជកម្ម, វិនិយោគ, និងវិស័យមួយចំនួនផ្សេងទៀត។

ព្រះអង្គម្ចាស់ Mohammed Bin Salman Bin Abdulaziz Al Saud រជ្ជទាយាទ និងជានាយករដ្ឋមន្ត្រីរបស់អារ៉ាប៊ីសាអូឌីត ក្នុងជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាឱកាសដែលសម្តេចធិបតី ចូលរួមក្នុង«កិច្ចប្រជុំកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ» នៅទីក្រុងរីយ៉ាដ ព្រះអង្គម្ចាស់នាយករដ្ឋមន្ត្រី បានលើកឡើងពីការលើកកម្ពស់ទំនាក់ទំនងរវាងកម្ពុជា-អារ៉ាប៊ីសាអូឌីត សំដៅឈានទៅបង្កើនកិច្ចសហប្រតិបត្តិការជាមួយគ្នា។ កិច្ចសហប្រតិបត្តិការនោះ ផ្តោតលើវិស័យពាណិជ្ជកម្ម, វិនិយោគ, ថាមពល និងវិស័យសក្តានុពលដទៃទៀត ដើម្បីសម្រេចបាននូវផលប្រយោជន៍រួមសម្រាប់ប្រទេស និងប្រជាជនទាំងពីរ។ 

ក្នុងជំនួបនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញនូវការពេញចិត្តចំពោះវឌ្ឍនភាពរីកចម្រើន នៃទំនាក់ទំនងទ្វេភាគីរវាងកម្ពុជា-អារ៉ាប៊ីសាអូឌីត ដូចដែលឆ្លុះបញ្ចាំងតាមរយៈការសម្រេចបង្កើតស្ថានឯកអគ្គរាជទូតអារ៉ាប៊ីសាអូឌីតប្រចាំនៅកម្ពុជា ជាដើម៕