ភ្នំពេញ៖ ក្រុមហ៊ុន Kenpax ដែលជាក្រុមហ៊ុនផ្គត់ផ្គង់ផលិតផលដល់ក្រុមហ៊ុនចែកចាយឧបករណ៍បរិក្ខារពេទ្យ Mckesson របស់សហរដ្ឋអាម៉េរិក គ្រោងបង្កើតរោងចក្រផលិតឧបករណ៍បរិក្ខារពេទ្យនៅកម្ពុជា។ នេះបើតាមការលើកឡើងរបស់ ក្រុមការងារក្រុមហ៊ុន Kenpax កាលពីថ្ងៃទី១២ ខែកុម្ភៈ ឆ្នាំ២០២៥។

ក្នុងជំនួបពិភាក្សាការងារជាមួយវិនិយោគិន ដែលមកស្វែងយល់ពីសក្ដានុពល និងកាលានុវត្តភាពវិនិយោគក្នុងវិស័យផលិតឧបករណ៍បរិក្ខារពេទ្យនៅកម្ពុជា ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អរគុណដល់ក្រុមហ៊ុន ដែលបានចាប់អារម្មណ៍បណ្ដាក់ទុនវិនិយោគក្នុងវិស័យផលិតឧបករណ៍បរិក្ខារពេទ្យនៅកម្ពុជា។ ឯកឧត្តម ស៊ុន ចាន់ថុល ក៏បានលើកឡើងពីការគាំទ្រ និងការសម្របសម្រួលជាមួយក្រសួង ស្ថាប័ន និងអាជ្ញាធរពាក់ព័ន្ធ ព្រមទាំងការលើកទឹកចិត្តនានារបស់រាជរដ្ឋាភិបាលលើគម្រោងវិនិយោគក្នុងវិស័យនេះផងដែរ។

ក្នុងជំនួបដដែលនោះ ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល មានប្រសាសន៍ថា គម្រោងវិនិយោគក្នុងវិស័យសុខាភិបាលនេះ គឺនឹងជំរុញផលិតកម្មផលិតផលសុខាភិបាលក្នុងស្រុកបន្ថែមទៀតផងដែរ៕